قالا تۇرعىندارى مەن قوناقتارى الدىمەن قولونەر كورمەسىن تاماشالادى. وندا وقۋشىلار سارايىنداعى «قولونەر»، «اعاش ونەرى»، «زەرگەرلىك ونەر»، «ءمۇسىن جانە كەراميكا» سەكىلدى ۇيىرمەلەردەگى وقۋشىلاردىڭ تۋىندىلارى قويىلدى. كەلۋشى قوناقتار جاس بۇلدىرشىندەردىڭ بۇيىمدارىنا قىزىعۋشىلىقپەن قاراپ، جوعارى باعاسىن بەردى.
سونداي-اق، ارنايى ۇيىمداستىرىلعان كونسەرتتىك باعدارلامانى تاماشالادى. كونسەرتتە دە تۇركىستان وقۋشىلار سارايىنداعى «ۆوكال»، «دومبىرا»، «گيتارا»، «ءداستۇرلى ءان»، «زاماناۋي بي»، «حالىق ءبيى» سەكىلدى ۇيىرمەلەردىڭ تالانتتارى ونەر كورسەتتى. ولار حالىق جانە الەمدىك كلاسسيكادان اندەر ورىنداپ، مىڭ بۇرالعان بيلەرىمەن كەلۋشىلەردى تاڭعالدىردى.
– بۇگىن ونەر كورسەتىپ جاتقان ورەندەردىڭ بارلىعى ءبىزدىڭ ۇيىرمەلەرگە قاتىسۋشى ورەندەر. قازىرگى تاڭدا بىزدە 60-قا جۋىق ۇيىرمە تۇرلەرى بار. بالا ءوزىنىڭ قابىلەتى مەن قارىمىنا بايلانىستى كەز كەلگەن ۇيىرمەگە قاتىسا الادى.
تۇركىستاندا ورنالاسقان وقۋشىلار سارايىنداعى بارلىق ۇيىرمەلەر مەن مۇمكىندىكتەر كەنتاۋ قالاسىندا دا بولادى. بۇل كەشتى ءبىز وسى قالامەن جاقىنىراق تانىسۋ ءۇشىن ۇيىمداستىردىق، – دەدى ينديرا سارقىت قىزى، وقۋشىلار سارايىنىڭ ديرەكتورى.
ايتا كەتەيىك، كەنتاۋدا وقۋشىلار سارايى ءوز جۇمىسىن باستادى. بۇگىنگى تاڭدا بالالاردى ۇيىرمەگە جازۋ جۇمىستارى جۇرگىزىلۋدە.
