كەلەر جىلدان باستاپ تۇركىستان وڭىرىندەگى 88 كاسىپورىندا ايلىق جالاقى كوتەرىلىپ، ەڭ تومەنگى جالاقى كوبەيەدى.
بۇل تۋرالى تۇركىستان وبلىسىنىڭ اكىمى جانسەيىت تۇيمەبايەۆ «ەلباسى جولداۋى مەن «رۋحاني جاڭعىرۋ» باعدارلاماسىن جۇزەگە اسىرۋ جانە تۇركىستان قالاسىن دامىتۋ بارىسى» تاقىرىبىندا ورتالىق كوممۋنيكاسيالار قىزمەتىنىڭ تۇركىستان قالاسىندا تۇڭعىش رەت وتكىزگەن كوشپەلى باسپا ءسوز كونفەرەنسياسىندا مالىمدەدى.
ەلباسى نۇرسۇلتان نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا ارناعان جولداۋىندا: "ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1،5 ەسە، ياعني 28 مىڭنان 42 مىڭعا دەيىن ءوسىرۋدى تاپسىرامىن. بۇل بارلىق سالا بويىنشا ءتۇرلى مەنشىك نىساندارىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىن تىكەلەي قامتيدى. بيۋدجەتتىك مەكەمەلەردە جۇمىس ىستەيتىن 275 مىڭ قىزمەتكەردىڭ ەڭبەكاقىسى كوبەيىپ، ورتا ەسەپپەن 35 پايىزعا وسەدى. وسى ماقساتتارعا 2019-2021 جىلداردا رەسپۋبليكالىق بيۋدجەتتەن جىل سايىن 96 ميلليارد تەڭگە ءبولۋ كەرەك"، دەگەن بولاتىن.
وسىعان بايلانىستى، وبلىس اكىمى ق ر پرەزيدەنتى ن.نازاربايەۆتىڭ قازاقستان حالقىنا ارناعان جولداۋى بويىنشا تۇركىستان وبلىسىندا اتقارىلىپ جاتقان شارالارعا توقتالدى.
"جولداۋعا ساي ءبىزدىڭ وڭىردە الداعى ۋاقىتتا اتقارىلاتىن جۇمىستار تۋرالى ايتاتىن بولساق. الدىمەن، وبلىستاعى كاسىپورىن باسشىلارى ەڭ تومەن جالاقىنى كوتەرۋ ماسەلەسىن قولدايتىنىن ءبىلدىرىپ، ىسكە كىرىستى.
"بۇگىنگى تاڭعا وبلىس اۋماعىندا 9798 كاسىپورىنى بار. ەڭ تومەنگى جالاقىنى كوتەرۋ بويىنشا ءتۇسىندىرۋ جۇمىستارى جۇرگىزىلىپ، ناتيجەسىندە ازىرگە 88 كاسىپورىنىندا جالاقىنى 2019 جىلدىڭ 1 قاڭتارىنان باستاپ كوتەرۋگە كەلىستى. بۇل تاعى دا كوبەيەدى" - دەدى اكىم.
ايماق باسشىسى باسپا ءسوز جيىنىندا تۇركىستان وبلىسىنىڭ ءبىلىم سالاسىنا ەنگىزگەن JUMYS.SITCEN.KZ جۇيەسىن قازاقستان رەسپۋبليكاسىنىڭ پرەزيدەنتى اكىمشىلىگى رەسپۋبليكادا ەڭ ۇزدىك جۇيە رەتىندە تاڭداعانىن ايتىپ، ءقازىر باسقا ونىرلەرگە تاراتۋ ماسەلەسى قولعا الىنعانىن جەتكىزدى. ناتيجەسىندە، جاڭارتىلعان ءبىلىم بەرۋ مازمۇنىمەن ساباق بەرەتىن 32 532 پەداگوگتىڭ ايلىق جالاقىسىنا قوسىمشا 30% قوسىلعان. بۇدان بولەك، ول وسى جىلدىڭ قىركۇيەك ايىنان باستاپ جاڭا فورمات بويىنشا 4 200 پەداگوگتىڭ ايلىق جالاقى ساناتتارىنا قاراي 30-50 پايىز ۇستەماقى تولەنىپ جاتقانىن دا مالىمدەدى (1 ملرد. 67 ملن. تەڭگە قارالعان).
وبلىسىمىزدا 468 197 وقۋشى قامتيتىن 902 ورتا ءبىلىم بەرۋ ۇيىمى جۇمىس ىستەيدى. ءبىلىم بەرۋ ۇيىمدارىندا جالپى 60 555 پەداگوگ كادرلار قىزمەت ەتەدى (2017 جىلى – 55147)، وتكەن جىلمەن سالىستىرعاندا 5 408-گە ءوستى.
سونداي-اق، وتىرىستا وبلىستىڭ مەديسينا سالاسىنداعى جاڭالىقتار دا جاريا ەتىلدى. ياعني، العاشقى مەديسينالىق سانيتاريالىق كومەك (امسك) دەڭگەيىندە باسىمدىقتى جانە نەگىزگى اۋرۋلاردى باسقارۋدى قامتاماسىز ەتۋ ماقساتىندا تۇركىستاندا وبلىسىندا اۋرۋلاردى باسقارۋ باعدارلاماسى (بۇدان ءارى - ابب) ەنگىزىلۋدە. اعىمداعى جىلى تۇركىستان وبلىسىنىڭ 23 العاشقى مەديسينالىق سانيتاريالىق كومەك (امسك) ۇيىمدارىندا ءۇش نوزولوگيا بويىنشا اۋرۋلاردى باسقارۋ باعدارلاماسى ەنگىزىلگەن.
2019 جىلدىڭ 1 قاڭتارىنان باستاپ باعدارلاما اياسىندا مەديسينا قىزمەتكەرلەرىن وقىتىپ، سەرتيفيكات العاندارعا جالاقىسىنا 20 پايىز قوسىمشا اقى تولەۋ ارقىلى كەزەڭ-كەزەڭىمەن ءوسىرۋ جوسپارلانۋدا.
ايتا كەتەيىك، وبلىستا جالپى 38 مەديسينالىق ۇيىمنىڭ بارلىعى ەلەكتروندى قۇجات اينالىمىنا وتكەن (100%). ال، 121 مەديسينالىق فورمانىڭ 74 ەلەكتروندى فورماتقا وتكەن (61،1%). سونىمەن قاتار، وڭىردە 1 768 871 ەلەكتروندى دەنساۋلىق پاسپورتى قۇرىلعان.
