وبلىس جانە قالا وندىرۋشىلەرىن ناسيحاتتاۋ ماقساتىندا وتكەن جارمەڭكەدە وڭىردە وندىرىلەتىن تاماق، فارماسيەۆتيكا، ماشينا جاساۋ، حيميا، جەڭىل جانە قۇرىلىس ونەركاسىپتەرىنىڭ جۇزدەگەن تاۋارلارى ۇسىنىلدى.
كورمەگە شىمكەنت جانە تۇركىستان وبلىسىنىڭ 200-دەن استام تاۋار وندىرۋشىلەرى مەن قازاقستاننىڭ باسقا ايماقتارىنان كەلگەن تاۋار وندىرۋشىلەر قاتىسۋدا. اتالعان شاراعا العاش رەت كوستيۋمدەر مەن ەرلەرگە ارنالعان كيىم تىگەتىن، كيىم شىعاراتىن جانە تۇرمىستىق حيميا شىعاراتىن وسى سىندى 15 جاڭا كومپانيا ءوز ونىمدەرىن الىپ كەلگەن.
ەكى كۇندىك كورمەنىڭ اشىلۋ سالتاناتىنا تۇركىستان وبلىسىنىڭ اكىمى ج.تۇيمەبايەۆ، شىمكەنت قالاسىنىڭ اكىمى ع.ءابدىراحيموۆ، وبلىستىق ءماسليحاتتىڭ حاتشىسى ق.بالابييەۆ، استانا، اتىراۋ، تاراز قالالارىنىڭ «اتامەكەن» كاسىپكەرلەر پالاتاسى باسشىلىعى مەن باسقا دا وڭىرلەردىڭ كاسىپكەرلەرى قاتىستى.
وتاندىق تاۋار وندىرۋشىلەردىڭ ونىمدەرىمەن تانىسقان وبلىس اكىمى ج.تۇيمەبايەۆ قازاقستان – دۇنيەجۇزىلىك ساۋدا ۇيىمىنا، ەۋرازيالىق ەكونوميكالىق وداعىنا، شانحاي ىنتىماقتاستىق ۇيىمىنا مۇشە بولىپ تابىلاتىنىن ايتىپ، ءوڭىر كاسىپورىندارى حالىقارالىق جانە ەكولوگيالىق ستاندارتتار تالاپتارىنا ساي كەلەتىن ونىمدەر شىعارۋى قاجەت ەكەنىن اتاپ ءوتتى. ءىس-شارانىڭ بارىسىندا وبلىس جانە قالا اكىمدەرى «ورداباسى قۇس» جشس-گى مەن «Karlskrona LC AB» جشس-نە ءونىم جانە كىزمەت كورسەتۋ سالاسىنداعى جەتىستىگى ءۇشىن تمد سىيلىعىن تابىستادى.
بۇدان بولەك شارادا «قازاقستاننىڭ ۇزدىك تاۋارى» اتتى بايقاۋ-كورمەسى ءوتىپ، جەڭىمپازدار ماراپاتتالاتىن بولادى. كونكۋرسقا كاسىبىن جاڭا باستاعان جانە تانىمال وتاندىق تاۋار وندىرۋشىلەر قاتىسۋدا، ولاردىڭ اراسىندا «مادلەن»، «ورداباسى قۇس»، «ۆيزيت»، «راۋان»، «التىن ءدان»، «شف گاۋحار»، «بارىس-2007»، «امانگەلدى»، «كارلسكرونا»، «زەردە كەراميكا»، كتز، «بال تەكستيل»، «نازار تەكستيل»، «Azala»، «پلانتا»، «ايكان» جانە ت.ب. كاسىپورىندار بار.
ءونىمنىڭ ساپاسى مەن باسەكەگە قابىلەتتىلىگى كريتەرييلەرىمەن باعالايتىن تاۋەلسىز ساراپشىلار ءۇش نوميناسيا بويىنشا قاتىسۋشىلاردى ىرىكتەيدى. اتاپ ايتقاندا «حالىق تۇتىناتىن ۇزدىك تاۋارلار»، «وندىرىستىك ماقساتتاعى ۇزدىك تاۋارلار» جانە «ۇزدىك ازىق-تۇلىك تاۋارلارى».
سونىمەن قاتار، كورمەدە ايماقتىق نوميناسيالارمەن ەڭ ۇزدىك كومپانيالار تاڭدالىنادى: «حالىق تاڭداۋى»، «جىل سەرپىنى»، «جىل برەندى»، «الەۋمەتتىك ماڭىزى بار ستارتاپ»، «ۇزدىك الەۋمەتتىك جوبا»، «ۇزدىك ەتنووندىرۋشى»، «تابيعي ءونىم ءوندىرۋشى» «يننوۆاسيالىق جوبا»، «جاس ءوندىرۋشى»، «ءۇزدى تاۋارلىق قاپتاما»، «ۇزدىك ەڭبەك جاعدايلارى» جانە «ەڭ ۇزدىك ايەل-جۇمىس بەرۋشى»، «قىزمەت كورسەتۋ سالاسىنداعى ۇزدىك جوبا»، «بيزنەس-ۆۋمەن-يننوۆاتور» نوميناسيالارى بويىنشا دا ايەلدەر بيزنەسىنە قولداۋ كورسەتىلەتىن بولادى.
جەڭىمپازدار استانا قالاسىندا وتەتىن «قازاقستاننىڭ ۇزدىك تاۋارى» رەسپۋبليكالىق بايقاۋ-كورمەسىنە قاتىسۋعا جولداما الادى.
