بۇگىن تۇركىستان وبلىسى جولاۋشىلار كولىگى جانە اۆتوموبيل جولدارى باسقارماسىنىڭ ۇيىمداستىرۋىمەن «قازاقستان جول عىلىمي-زەرتتەۋ ينستيتۋتى»، «ۇلتتىق جول اكتيۆتەرى ساپاسى ورتالىعى» رمك، تۇركىستان وبلىسى مەن شىمكەنت قالاسىنداعى فيليالى، شىمكەنت قالاسىنىڭ سالالىق باسقارماسى، وبلىسىمىزداعى جول سالۋشى مەردىگەر، اۆتورلىق، تەحنيكالىق قاداعالاۋشى مەكەمەلەرى جانە اۋدان، قالا اكىمدىكتەرىنىڭ قاتىسۋىمەن كەڭەيتىلگەن جيىن ءوتتى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسىندا اۆتوموبيل جولدارىن سيفرلاندىرۋ باعىتىندا ءبىرقاتار شارالار جۇزەگە اسىرىلۋدا. اتاپ ايتقاندا، تۇركىستان قالاسىنداعى ەكى جولاۋشىلار تاسىمالى باعىتىنىڭ اۆتوبۋستارىنا جول اقىسىن ەلەكتروندى تولەۋ جۇيەسى جوبا ەنگىزىلىپ، جولاۋشىلارعا قىزمەت ەتۋدە.
بۇل جوبا اياسىندا قالاداعى اۆتوبۋسقا پلانشەتتەر مەن 120 QR-كود ورناتىلىپ، جولاۋشىلارعا ىڭعايلى تولەم ادىستەرى ۇسىنىلدى. سونىمەن قاتار، قوعامدىق كولىكتەردىڭ قوزعالىسىن باقىلاۋ ماقساتىندا ديسپەچەرلىك ورتالىق ىسكە قوسىلدى، بۇل اۆتوبۋستاردىڭ GPS ترەكەرلەرىمەن جابدىقتالۋى ارقىلى مۇمكىن بولدى.
وبلىستاعى اۋدانارالىق جانە وبلىسارالىق تۇراقتى باعىتتارداعى 594 جولاۋشى تاسىمالدايتىن كولىك قۇرالىنىڭ بارلىعىنا GPS قۇرىلعىلارى ورناتىلدى. بۇل شارالار جولاۋشىلار تاسىمالىنىڭ ساپاسىن ارتتىرۋعا جانە كولىك قوزعالىسىن ءتيىمدى باسقارۋعا مۇمكىندىك بەرەدى.
جالپى، تۇركىستان وبلىسىندا كولىك سالاسىن سيفرلاندىرۋ بويىنشا ءبىرقاتار جوبالار جۇزەگە اسىرىلىپ، جولاۋشىلار تاسىمالى مەن جول قوزعالىسىن باسقارۋ ساپاسى ارتتىرىلۋدا.
ءماجىلىس بارىسىندا اۆتوموبيل جولدارى سالاسى بويىنشا وزەكتى ماسەلەلەر ورتاعا سالىندى. ناقتىراق ايتقاندا، جول جوندەۋ جۇمىستارىنا جاڭا تەحنولوگيالاردى قولدانۋ، سمەتالىق قۇجاتتامالاردى ازىرلەۋ كەزىندە نورماتيۆتىك بازاعا ەنگىزىلىپ جاتقان وزگەرىستەر جانە كارەرلەردىڭ ءبىرىڭعاي ەلەكتروندىق بازاسىن قالىپتاستىرۋ، اۆتورلىق، تەحنيكالىق قاداعالاۋشى مەكەمەلەر تاراپىنان تۋىندايتىن سۇراقتار جانە وبلىستاعى جول ماماندارىن قايتا دايارلاۋدان وتكىزۋ بويىنشا ناقتى مالىمەتتەر بەرىلدى.
جيىن بارىسىندا «قازجولعزي» پرەزيدەنتى اليبايەۆا ارمان جانە «ۇلتتىق جول اكتيۆتەرى ساپاسى ورتالىعى» رمك باس ديرەكتورى ايتبايەۆ بولاتبەك بايانداما جاساپ، وزەكتى ماسەلەلەرگە كەڭىنەن توقتالىپ ءوتتى. سونداي-اق مەردىگەر مەكەمەلەردىڭ جانە اۋدان، قالا اكىمدىكتەرىنىڭ ۇسىنىس-پىكىرلەرىن تىڭداپ، سۇراقتارىنا جاۋاپ بەردى.
