ايماق باسشىسى سۋرەتشىلەردىڭ اپتا بويى سالعان سۋرەتتەرىن تاماشالاپ، ونەر يەلەرىنە شىعارماشىلىق تابىس تىلەدى.
– بۇل شاراعا الەمنىڭ ءار تۇكپىرىنەن كەلگەن اتاقتى سۋرەتشىلەردىڭ تۋىندىلارى تۇركىستان وبلىسىنىڭ كوركەمسۋرەت قورىن تولىقتىرۋعا ءوز سەپتىگىن تيگىزەرى ءسوزسىز. حالىقارالىق دەڭگەيدەگى بەلگىلى قىلقالام شەبەرلەرىنىڭ وسى اپتالىقتاعى شىعىرماشىلىق ىزدەنىسىنەن قۇندى ونەر تۋىندىسى تابىلادى دەپ سەنەم. اتالعان شارانى ۇيىمداستىرۋدىڭ نەگىزگى باستى ماقساتى – تۇركىستان ءوڭىرىنىڭ وزىندىك تابيعي گەوگرافيالىق ەرەكشەلىكتەرىن جانە كوزتارتارلىق ورىندارىن بەينەلەيتىن حالىقارالىق دەڭگەيدەگى ونەر شىعارمالارىن جاساپ، ولاردى الەمدىك دەڭگەيدە تانىتۋ، سول ارقىلى ءتۋريزمدى دامىتۋعا ۇلەس قوسۋ، – دەدى جانسەيىت قانسەيىت ۇلى.
حالىقارالىق سۋرەتشىلەر پلەنەرى 2018 جىلدىڭ 22-27 شىلدە ارالىعىندا وبلىس اكىمدىگىنىڭ باستاماسىمەن، وبلىستىق مادەنيەت جانە تىلدەردى دامىتۋ باسقارماسىنىڭ، تولەبي اۋدانى اكىمدىگىنىڭ ۇيىمداستىرۋىمەن وتكىزىلدى. سيمپوزيۋمعا تۇركيا، قىرعىزستان، رەسەي، وزبەكستان، ازەربايجان ەلدەرىنەن جانە رەسپۋبليكامىزدىڭ استانا، الماتى، ورال، اقتوبە، اتىراۋ، پاۆلودار، قاراعاندى، تاراز قالالارىنان، سونداي-اق، تۇركىستان وبلىسىنىڭ ارنايى ءبىلىمى بار كاسىبي 24 سۋرەتشى قاتىستى.
ولار ءبىر جەتى ىشىندە تۇركىستان، تولەبي، سوزاق، بايدىبەك، وتىرار، ورداباسى، ماقتارال، جەتىساي، سارىاعاش، شاردارا اۋداندارىنداعى ءبىرقاتار تاريحي – مادەني ورىنداردا بولىپ، سونداعى كورىنىستەردى قاعاز بەتىنە ءتۇسىردى.
شارانىڭ ماقساتى – ەلىمىزدىڭ ءسالت-داستۇرىن، ادەپ-عۇرپىن، عاسىرلاردان سىر شەرتكەن قاسيەتتى مادەني ساۋلەتتىك ەسكەرتكىشتەردى، تاريحي ورىندار مەن ۇلتتىق ونەرىمىزدى، تاماشا تابيعاتىمىزدى ناسيحاتتاۋ. سونداي-اق، تۇركى تىلدەس ەلدەردىڭ ەڭبەك سىڭىرگەن ونەر قايراتكەرلەرى، تالانتتى قىلقالام شەبەرلەرى، كەسكىندەمە سالاسى بويىنشا ءوزارا تاجىريبە جانە پىكىر الماسۋدى جۇزەگە اسىرۋ. نەگىزى ءبىر، تىلەگى ورتاق، تۇركى جۇرتىنىڭ حالىقتار اراسىنداعى دوستىق بايلانىستارىن نىعايتا وتىرىپ، ءتۋريزمدى دامىتۋعا ۇلەس قوسۋ.
ايتا كەتەيىك، جيىننىڭ سوڭى نۇرلان ونەربايەۆ، گۇلنار سيقىمبايەۆا سىندى ەسترادا جۇلدىزدارىنىڭ قاتىسۋىمەن وتكەن كونسەرتتىك باعدارلاماعا ۇلاستى.
ەسكە سالساق، ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا وبلىستا ءداستۇرلى تۇردە وتەتىن وبلىستىق، رەسپۋبليكالىق جانە حالىقارالىق ءىس-شارالار جوسپارى بەكىتىلگەن. وڭىرلەردىڭ الەۋمەتتىك جاعدايى مەن تابيعات ەرەكشەلىگىن ەسكەرە وتىرىپ، ءىس – شارالار ءار اۋداندا وتكىزىلۋدە. ماسەلەن، قاسيەتتى قازىعۇرت تاۋىنىڭ بوكتەرىندە «ناۋرىز قازىعۇرتتان باستالادى» ءىس-شاراسىنان باستالىپ، وبلىسىمىزدىڭ سيمۆولى، «قىزىل كىتاپقا» ەنگەن، ايىرىقشا قورعاۋدى قاجەت ەتەتىن قىزعالداقتى ناسيحاتتاۋعا ارنالعان جيىن تۇلكىباس اۋدانىنداعى شۇبايقىزىلدا جالعاسىن تاپتى. سونداي-اق، ورداباسى تاۋىندا «ورداباسىعا ورالۋ: بەرەكە باسى – بىرلىك»، ءداستۇردى دارىپتەۋ ماقساتىندا بايدىبەك اۋدانىندا «قىمىزمۇرىندىق» قىمىز فەستيۆالى ۇيىمداستىرىلدى. مىنە، بۇگىن وسىناۋ يگى باستاما تولەبي اۋدانىندا «حالىقارالىق سۋرەتشىلەر پلەنەرى» ىس-شاراسىمەن جالعاستىرىپ وتىر.
تۇركىستان وبلىسى اكىمىنىڭ باسپا ءسوز قىزمەتى
