سايرام اۋدانىندا ورنالاسقان زاۋىت العاشقىدا جۇمىسىن 24 اداممەن باستاسا، ءقازىر مۇنداعى جۇمىسشىلاردىڭ سانى 47-گە جەتكەن.
«بيزنەستىڭ جول كارتاسى – 2020» باعدارلاماسى مەن «وڭىرلەر كاسىپكەرلىگىن قولداۋ كارتاسى اياسىندا»، «دامۋ» كاسىپكەرلىكتى قولداۋ قورىنىڭ كومەگىمەن كاسىپورىنعا جەڭىلدەتىلگەن پايىزبەن نەسيە بەرىلىپ، ينۆەستيسيالىق سۋبسيدياعا قولداۋ كورسەتىلگەن.
كەيىننەن زاۋىتقا مودەرنيزاسيا جۇرگىزىلىپ، سايرام اۋدانى، اقسۋكەنت اۋىلدىق وكرۋگىنە ءسۇت زاۋىتى كوشىرىلىپ، ءوز جۇمىسىن باستادى.
تۇركيادان قۇرىلعىلار اكەلىپ، تابيعي سۇتكە قوزىنىڭ ۇلتابار-مايەگىن قوسا وتىرىپ، تۇرىك تەحنولوگياسىمەن دايىندالاتىن «ەمير» سىرلارى ساپانىڭ ەۋروپالىق ستاندارتىنا سايكەس وندىرىلەدى. ءسۇت ونىمدەرىنەن ىرىمشىك دايىندايتىن كومپانيالار اراسىنان بۇل كاسىپورىن 2017 جىلى قازاقستان بويىنشا جالعىز حالال سەرتيفيكاتىنا يە بولعان.
زاۋىتقا ءسۇتتى سايرام اۋدانىنىڭ قارابۇلاق، مانكەنت، قارامۇرت ەلدىمەكەندەرىنىڭ تۇرعىندارىنان جينايدى. جاڭا ءوندىرىس ورنىندا تاۋلىگىنە 100 توننا ءسۇت وندىرىلەدى. مۇندا ىرىمشىكتىڭ 12 ءتۇرى شىعارىلىپ، قازاقستاننىڭ تۇكپىر-تۇكپىرىنە تاراتىلۋدا.
زاۋىت باسشىلىعىنىڭ مالىمدەۋىنشە، كاسىپورىن تاۋەلسىز زەرتحاناعا قوماقتى اقشا تولەپ، ءار ون كۇن سايىن ءوز ونىمدەرىنىڭ ساپاسىن تەكسەرتەدى. سودان دا بولار، تابيعي سىر-ىرىمشىكتەرى سورەدە ۇزاق جاتىپ قالعان ەمەس. ونىمدەرىنىڭ ساقتالۋ مەرزىمى – 2-3 اي. زاۋىتتىڭ ىشىندە فيرمالىق دۇكەن جوق، ديستريبيۋتەرلەرى ساۋدا ورىندارىنا شىعارادى.
– «ەمير» ونىمدەرى بارلىق سانيتارلىق نورمالاردى مۇقيات ساقتاي وتىرىپ، تۇركيانىڭ جوعارى تەحنولوگيالىق جابدىعىندا ازىرلەنەدى. «ەمير» ىرىمشىگىنىڭ 12 ءتۇرىنىڭ ءارقايسىسىندا اقۋىز، كالسيي، ماگنيي سىندى كوپتەگەن قۇندى دارۋمەندەر بار، - دەيدى مەكەمە باسشىسى الماگۇل ايكان.
اتالعان كاسىپورىننىڭ نەگىزگى كاسىپكەرلىك تۇجىرىمداماسى - قوعام ومىرىنە بەلسەندى قاتىسۋ. بۇل رەتتە، مەكەمە مەشىتكە، مۇگەدەك بالالارعا، تۇرمىسى تومەن وتباسىلارعا، ۇوس ارداگەرلەرىنە ءاردايىم دەمەۋشىلىك كومەك كورسەتىپ كەلەدى. ولار قارجىلىق نەمەسە باسقا دا كومەك كورسەتەتىن قىزمەت سالاسىنا قاراماستان جانە الەۋمەتتىك ماسەلەلەردى شەشۋگە ىقپال ەتۋگە اتسالىسۋدا.
كومپانيا ءونىم جەلىلەرىن كەڭەيتە وتىرىپ، بەلسەندى دامۋدا. 2013 جىلدان بەرى «قازاقستاننىڭ ۇزدىك تاۋارى»، «وڭتۇستىك قازاقستان بيزنەسىنىڭ ماقتانىشى»، «وزات ءسۇت وڭدەۋشى»، «اۋىلشارۋاشىلىق ونىمدەرىن وڭدەۋدىڭ ۇزدىگى»، «ۇزدىك حالال كاسىپورىن» جانە ت.ب. بىرنەشە ماراپاتتاۋلارعا يە «AYKAN» كاسىپورنى وبلىسىمىزىڭ ەكونوميكاسىنا وراسان زور ۇلەسىن قوسۋدا.
