تۇركىستان وبلىسى اكىمىنىڭ ورىنباسارى ەرتاي التايەۆتىڭ توراعالىعىمەن ءماجىلىس ءوتتى،- دەپ حابارلايدى Dalanews.kz
وعان جاۋاپتى سالا باسشىلارى مەن ءدىن قىزمەتكەرلەرى جانە اۋدان، قالا اكىمدەرىنىڭ ورىنباسارلارى بەينەبايلانىس ارقىلى قاتىسىپ، وڭىردەگى ءدىني عيماراتتاردىڭ قۇجاتتارىن زاڭناماعا سايكەس راسىمدەۋ جانە ونىڭ قۇرىلىستارىن رەتتەۋ ماسەلەسى قارالدى.
"وبلىستاعى ءدىني عيماراتتاردىڭ قۇجاتتارىن زاڭ تالاپتارىنا سايكەس راسىمدەۋدى نازاردا ۇستاڭىزدار. كەيبىر اۋدانداردا جۇيەلى جۇمىستار اتقارىلىپ جاتىر. ءبىرقاتار اۋدانداعى جاۋاپتىلار جۇمىستى شيراتۋلارى كەرەك. زاڭناماعا سايكەس، عيماراتتاردىڭ قۇجاتتارى تۇگەندەلمەي قۇرىلىس جۇمىستارىن باستاۋعا تىيىم سالىنادى"، – دەگەن وبلىس اكىمىنىڭ ورىنباسارى عيماراتتاردىڭ زاڭسىز سالىنۋىن قاتاڭ باقىلاۋعا الۋ قاجەتتىگىن ەسكەرتتى.
سونىمەن بىرگە دەمەۋشىلەر مەن مەسەناتتارعا الەۋمەتتىك نىساندار سالۋ دا ماڭىزدى ەكەنىن ءتۇسىندىرۋ قاجەتتىگى ايتىلدى.
جيىن سوڭىندا وسى اتالعان ماسەلەلەر بويىنشا ءتيىستى ۇسىنىستار ايتىلىپ، اۋدان، قالا اكىمدەرى مەن ءتيىستى باسقارمالاردىڭ باسشىلارىنا تاپسىرمالار بەرىلدى.
