اتاپ ايتقاندا، تاۋەلسىزدىك العان جىلدان بەرى سالىستىرعاندا ءىرى قارا مال باسى 2،5 ەسە، ۇساق مال باسى 12 %-عا، جىلقى 4 ەسەگە، تۇيە 2 ەسەگە ارتتى.
الايدا بيىلعى قۋاڭشىلىق باتىس وڭىرلەرىمەن قاتار، تۇركىستان وبلىسى سارىاعاش، كەلەس اۋداندارىنىڭ القاپتارىنا دا كەرى اسەرىن تيگىزىپ، تابيعي ءشوپ بىتىك شىقپادى. بۇل جاعداي مال ازىعىنا سۇرانىستى ارتتىرىپ، الىپ-ساتارلار ارقىلى باعا كوتەرىلدى.
وبلىستىق اۋىل شارۋاشىلىعى باسقارماسى تاراپىنان 2021 جىلدىڭ 10 ايىندا اۋىل شارۋاشىلىعى جانۋارلارىنىڭ انالىق باسىنا سارىاعاش اۋدانى بويىنشا 112 اۋىل شارۋاشىلىعى تاۋارىن وندىرۋشىلەرگە 170 606،5 مىڭ تەڭگە، كەلەس اۋدانى بويىنشا 106 اشتو-گە 233 164،5 مىڭ تەڭگە مەملەكەتتىك قولداۋ قارجى (سۋبسيديا) بەرىلدى.
اۋىل شارۋاشىلىعى جانۋارلارىنىڭ انالىق باسىنا سەلەكسيالىق جۇمىستار جۇرگىزگەنى ءۇشىن مەملەكەت تاراپىنان تولەنگەن قولداۋ قارجى ءاشتو-نىڭ تىكەلەي مال ازىعىن ساتىپ الۋ شىعىنىن ازايتادى، سەبەبى شارۋالار تاراپىنان سەلەكسيالىق اسىلداندىرۋ جۇمىستارىنا قاراجات جۇمسالمايدى.
سونىمەن قاتار سارىاعاش، كەلەس اۋداندارىنىڭ مال شارۋاشىلىعىمەن اينالىساتىن فەرمەرلەردى قولداۋ ماقساتىندا تۇركىستان وبلىستىق اۋىل شارۋاشىلىعى باسقارماسىنىڭ باستاماسىمەن مال ازىعىن ساتىپ الۋ شىعىندارىن ازايتۋ ءۇشىن تومەن پايىزدى مولشەرلەمەمەن قارجى ۇيىمدارى ارقىلى نەسيە بەرۋ تەتىكتەرى قاراستىرىلدى.
9 قاراشادا وبلىستىق اۋىل شارۋاشىلىعى باسقارماسى باسشىسىنىڭ ورىنباسارى نۇرجىگىت نازاربەك ۇلى جانە «ىرىس» مقۇ» ج ش س، «وڭتۇستىك» ايو» ج ش س باسشىلارى باستاعان توپ سارىاعاش اۋدانى، ءالىمتاۋ اۋىل وكرۋگىنە نەسيە الۋعا نيەت بىلدىرگەن ءالىمتاۋ، جامبىل، بوزاي اۋىلدىق وكرۋگتەرىنىڭ 100-گە جۋىق شارۋالارىن جيناپ، بەرىلەتىن نەسيەنىڭ شارتتارىن ءتۇسىندىرىپ، جىلدىق ۇستەمە قارجىسى 6 پايىزدان اسپايتىنىن جانە كاسىپكەرلىك سەرتيفيكات تالاپ ەتىلمەيتىنىن جەتكىزدى.
جينالىس قورىتىندىسىمەن شارۋالار باسشىلىق وكىلدەرىنە ريزاشىلىقتارىن ءبىلدىرىپ، دەر كەزىندە بەرىلەتىن نەسيەنىڭ مال ازىعىن ساتىپ الۋعا سەپتىگىن تيگىزەتىنىن جەتكىزدى.
