– تۇلكىباس اۋدانىنىڭ الەۋمەتتىك-ەكونوميكالىق دامۋىنا كوڭىل بولىنگەن. تابيعاتى عاجايىپ، اۋاسى شيپالى ءوڭىردىڭ الەۋەتى وتە جوعارى. اسىرەسە ءتۋريزمدى دامىتۋعا مۇمكىندىك مول. مەملەكەت باسشىسى قاسىم-جومارت كەمەل ۇلى تۇركىستان وبلىسىنىنا جۇمىس ساپارىندا حالىقپەن تىعىز جۇمىس ىستەۋدى كۇشەيتۋدى تاپسىردى. سونىمەن بىرگە قازاقستان حالقىنا ارناعان جولداۋىندا حالىقتىڭ كوكەيىندە جۇرگەن وزەكتى ماسەلەر بويىنشا ناقتى تاپسىرمالار بەردى. بۇل رەتتە ءاربىر ازامات ءوز سالاسى بويىنشا ەڭبەك ەتۋى ءتيىس. جاڭا باستامالار تۇلكىباس اۋدانىنىڭ ەكونوميكالىق دامۋىنا تىڭ سەرپىن بەرەدى. اۋىل شارۋاشىلىعى، تۋريزم جانە ونەركاسىپ سالاسىنىڭ دامۋ قارقىنىن ارتتىرامىز، – دەدى دارحان ساتىبالدى.
بۇگىندە اۋداننىڭ ينفراقۇرىلىمىن ارتتىرۋ، تۇرعىنداردىڭ ءومىر ساپاسىن جاقسارتۋ باعىتىندا جۇيەلى جۇمىستار اتقارىلۋدا. بيىل ەڭبەكشى جانە مايلىكەنت اۋىلدارىندا جاڭا مەكتەپتەر پايدالانۋعا بەرىلەدى. «اۋىل – ەل بەسىگى» جوباسى اياسىندا 11 ەلدى مەكەندە 32 جوبا ىسكە اسىرىلۋدا. امانگەلدى، ابايىل جانە تاۋساعىز ەلدى مەكەندەرىندە 3 مەكتەپتىڭ قۇرىلىسى جۇرۋدە. ال كەرشەتاس ەلدى مەكەنىندە مەكتەپتى كۇردەلى جوندەۋ جۇمىستارى قولعا الىنىپ، جاڭا مادەنيەت ءۇيىنىڭ قۇرىلىسىنا قاجەتتى قارجى قاراستىرىلدى. اقبيىك، كەلتەماشات، رىسقۇل، شۇقىربۇلاق ەلدى مەكەندەرىندە 4 دارىگەرلىك امبۋلاتوريانىڭ قۇرىلىسى جۇرگىزىلۋدە.
وسى جانە وزگە دە دەرەكتەرگە توقتالعان وبلىس اكىمى كەزدەسۋدەن كەيىن بىرنەشە تۇرعىندى ءوتىنىشى بويىنشا جەكە قابىلداپ، ماسەلەلەرىن تىڭدادى. ءاربىر ءوتىنىش حاتتاماعا ەنگىزىلىپ، ءتيىستى جۇمىس جۇرەدى.
وبلىس اكىمى جۇمىس ساپارىندا تۇلكىباستاعى ءبىرقاتار كاسىپورىندى ارالادى، الدا جۇزەگە اساتىن جوبالارمەن تانىستى. سولاردىڭ ءبىرى – سۋسىن شىعاراتىن «BEIBARYS BOTTLERS» ج ش س. RC سola اتاۋىمەن سان الۋان ءتۇرلى اۋىز سۋ جانە قوش ءيىسى بار سۋسىندار شىعاراتىن نىساننىڭ قۇرىلىس جۇمىستارى بيىل شىلدە ايىندا باستاۋ الدى. جوبانىڭ جالپى قۇنى – 7 ملرد 600 ملن تەڭگە. نىسان 2024 جىلى پايدالانۋعا بەرىلمەك. ىسكە قوسىلعان جاعدايدا 100-گە جۋىق جاڭا جۇمىس ورنى اشىلادى دەپ كۇتىلۋدە.
ءوڭىر باسشىسى «كەن-تاۋ» ءجشس-نىڭ الما ساقتايتىن زاماناۋي قويماسىن كوردى. سونىمەن بىرگە وبلىس باسشىسىنا مەملەكەتتىك قايتارىمسىز گرانت الىپ كاسىبىن اشقان ازاماتتار مەن تاۋار وندىرۋشىلەردىڭ كورمەسى تانىستىرىلدى. تۇلكىباس اۋدانىندا جىل باسىنان بەرى بيزنەس يدەيالاردى جۇزەگە اسىرۋ بويىنشا 66 ازامات قايتارىمسىز گرانتقا قول جەتكىزىپ وتىر.
دارحان ساتىبالدى جەكە ينۆەستيسيالار مەن بيزنەس يدەيالار ارقىلى جۇمىس ورىندارىن كوبەيتۋدى تاپسىردى. اسىرەسە شاعىن جانە ورتا كاسىپكەرلىككە، جاڭا كاسىپورىندار اشۋعا باسىمدىق بەرۋ كەرەكتىگىن ايتتى. تۇرعىندارعا كاسىپكەرلىكتى دامىتۋعا مەملەكەتتەن بەرىلەتىن مۇمكىندىكتەردى ءتۇسىندىرۋ جۇمىستارى دا كۇشەيتىلە تۇسەدى.
