تۇركىستان وبلىسىندا العاشقى قاۋىن-قاربىز ونىمدەرى جينالا باستادى. جەتىساي اۋدانىنىڭ ديقاندارى ەرتە كوكتەمدە ەككەن باقشا داقىلدارىنىڭ العاشقى جەمىسىن جيناپ، ونىمدەرىن ىشكى نارىق جانە رەسەيگە جونەلتۋدە،- دەپ حابارلايدى Dalanews.kz
ءقازىر 100 تونناداي قاۋىن ەكسپورتقا شىعارىلدى. شارۋالار ءار گەكتاردان ورتا ەسەپپەن 400 سەنتنەرگە دەيىن ءونىم الۋدى كوزدەپ وتىر.
ال كەلەس اۋدانىندا قاربىز ماۋسىمى قارقىندى باستالدى. ەگىنشىلەر سۋارمالى القاپتارعا ەككەن ءونىمىن ەرتە جينادى. قاربىزدىڭ سالماعى 15 كەلىگە دەيىن جەتىپ، كەلىسى 200 تەڭگەدەن ساتىلىپ جاتىر.
"سۋارۋ ماۋسىمى باستالعالى بەرى ەلىمىزدىڭ وڭتۇستىك وڭىرلەرىندەگى «قازسۋشار» فيليالدارى ديقاندارعا 2،5 ملرد تەكشە مەتردەن استام سۋ بەردى. تۇركىستان وبلىسىنا 1،3 ملرد تەكشە مەتر سۋ بەرىلىپ، 276 مىڭ گەكتار جەر سۋارىلدى. جەتىساي اۋدانىندا 84،3 مىڭ گەكتار ەگىس القابىن سۋارۋعا 304 ملن تەكشە مەتر سۋ جىبەرىلدى. ونىڭ 97،5 ملن تەكشە مەترى 13 384 گەكتار باقشا جانە كوكونىس القاپتارىن سۋارۋعا جۇمسالدى"، - دەلىنگەن سۋ رەسۋرستارى جانە يرريگاسيا مينيسترلىگىنىڭ حابارلاماسىندا.
