تۇركىستان وبلىسىنىڭ ماقتاارال اۋدانىندا ءتارتىپ ساقشىلارىنا وق اتىپ، قارسىلىق كورسەتكەن ەر ادامدى پوليسەيلەر اتىپ ءولتىردى. وقيعا وتباسىلىق جانجالدان كەيىن بولعان، دەپ حابارلايدى Dalanews.kz.
تۇركىستان وبلىستىق پوليسيا دەپارتامەنتىنىڭ مالىمەتىنشە، ءتارتىپ ساقشىلارىنا جەرگىلىكتى تۇرعىن حابارلاسىپ، بۇرىنعى كۇيەۋى ۇيگە قارۋمەن كەلىپ، كامەلەتكە تولماعان بالالاردىڭ كوزىنشە جانجال شىعارعانىن ايتقان.
پوليسيا كەلگەن كەزدە ەر ادامدى ۇستاۋعا ارەكەت جاسالعان. الايدا ول ۇيدەن قاشىپ شىعىپ، كورشى اۋلاداعى سارايعا تىعىلعان. قاۋىپسىزدىك ءۇشىن اۋماق تولىق قورشاۋعا الىنعان.
قۇقىق قورعاۋ ورگاندارىنىڭ زاڭدى تالابىنا قاراماستان، ەر ادام قارۋ قولدانۋدى توقتاتپاعان. پوليسەيلەر الدىمەن ەسكەرتۋ رەتىندە اۋاعا وق اتقانىمەن، ول باعىنباعان. سوڭىندا ءتارتىپ ساقشىلارى قىزمەتتىك قارۋ قولدانۋعا ءماجبۇر بولىپ، ەر ادام وقيعا ورنىندا كوز جۇمدى.
پوليسيانىڭ حابارلاۋىنشا، قازىرگى ۋاقىتتا بولعان جاعدايدىڭ بارلىق ءمان-جايىن انىقتاۋ ءۇشىن ءتيىستى تەرگەۋ جانە جەدەل ءىس-شارالار جۇرگىزىلىپ جاتىر. تەرگەۋ بارىسى وبلىستىق پوليسيا باسشىلىعىنىڭ باقىلاۋىندا.
وقيعا ورنىن قاراپ-تەكسەرۋ كەزىندە تىركەلمەگەن شولاق مىلتىق، وق-دارىلەر جانە گيلزالار تاركىلەندى. قىلمىستىق ءىس قوزعالدى.
