قازىرگى تاڭدا اۋداندا اق التىندى قولمەن تەرۋ جۇمىستارى ج.ەرالييەۆ، ش.دىلدابەكوۆ، ماقتالى، قاراقاي اۋىل وكرۋگتەرىندەگى شارۋا قوجالىقتارى باستاپ جىبەردى.
جالپى اعىمداعى جىلى اۋداندا 48220 گەكتارعا ماقتا ءدانى سەبىلگەن. اۋدان شارۋالارى وتكەن جىلى ورتاشا ەسەپپەن ماقتانىڭ ءار گەكتارىنان 25 سەنتنەردەن ءونىم جيناسا، بيىل دا وسى كورسەتكىشتەن تومەن بولمايدى دەپ بولجام جاساپ وتىر. ەندى بىرەر كۇندە ماقتا القاپتارىنا كومبايندار جۇمىسقا كىرىسپەك. ءازىردىڭ وزىندە اۋداندا 70-كە جۋىق «دجوندير» ماقتا تەرەتىن كومباينداردىڭ تەحنيكالىق دايىندىقتارى پىسىقتالۋدا. ونىڭ 65ء-ى 4 جۇيەكتى. ياعني، ءاربىر كومباين ءبىر مەزەتتە 4 جۇيەكتەگى اق التىندى جيناۋعا قاۋقارلى.
ايتا كەتەرلىگى، شارۋالارعا مەملەكەت تاراپىنان بەرىلەتىن جانار-جاعارماي تالوندارى تاراتىلىپ بەرىلۋدە. سونداي-اق، القاپتاردا ماقتانى حيميالىق ادىسپەن قۋراتۋ جۇمىستارى جۇرگىزىلىپ جاتىر. سونىمەن قاتار، اۋدان كولەمىندە اق التىن جيناۋعا ارنالعان قابىلداۋ بەكەتتەرى ىسكە قوسىلۋدا.
تۇركىستان وبلىسى اكىمىنىڭ باسپا ءسوز قىزمەتى
