فورۋمعا ارنايى شاقىرتۋمەن امەريكا قۇراما شتاتى، وزبەكستان، قىرعىزستان، تاجىكىستان رەسپۋبليكالارىنان كەلگەن قوناقتار مەن ق ر اقدم (اقپارات جانە قوعامدىق دامۋ مينيستىرلىگى) ازاماتتىق قوعام ىستەرى كوميتەتىنىڭ وكىلى، «قازاقستاننىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى قاتىستى.
فورۋمنىڭ باستى ماقساتى – اۋىلدىق جەرلەردەگى ۇكىمەتتىك ەمەس ۇيىمداردىڭ باستامالارىن قولداۋ، ولاردى جان-جاقتى دامىتۋ، ساۋاتتىلىعىن ارتتىرۋ. ازاماتتىق قوعاممەن بىرگە ۇكىمەتتىك ەمەس ۇيىمداردىڭ بەلسەندىلىگىن كوتەرۋ.
فورۋمعا سپيكەر رەتىندە امەريكا قۇراما شتاتى، ۆاشينگتوننان – مۋبوراك تاشپۋلاتوۆا، وزبەكستان رەسپۋبليكاسىنان – داميرا توحتاسىنوۆنا، قىرعىزستان رەسپۋبليكاسىنان – نۇرگۇل جانايەۆا، تاجىكىستان رەسپۋبليكاسىنان – نۋريددين كارشيبويەۆ قاتىسسا، فورۋمنىڭ نەگىزگى سپيكەرى رەتىندە «قازاقستاننىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى – بانۋ نۇرعازييەۆا، تۇركىستان وبلىسىنىڭ «قۇرمەتتى ازاماتى» شارىپبەك جامالبەك، «بەرەكە» قوعامدىق بىرلەستىگىنىڭ ءتورايىمى – روزا ابدۋللايەۆا ءسوز سويلەدى.
رەسپۋبليكا كولەمىندە وتكىزىلىپ جاتقان شارانىڭ اشىلۋ سالتاناتىندا تۇركىستان وبلىسى قوعامدىق دامۋ باسقارماسىنىڭ باسشىسى اڭسار وسەربايەۆ ءسوز سويلەپ، ايماق باسشىسىنىڭ قۇتتىقتاۋ حاتىن وقىپ بەردى.
– سىزدەردىڭ ەل يگىلىگى جولىنداعى باستامالارىڭىزعا مەملەكەت تاراپىنان لايىقتى قولداۋ كورسەتىلىپ كەلەدى. الداعى ۋاقىتتا «جاڭا قازاقستاننىڭ» دامۋ جولىنا بەت تۇزەگەن ەلىمىزدىڭ جارقىن بولاشاعى ءۇشىن ايانباي ەڭبەك ەتەتىندەرىڭىزگە كامىل سەنەمىن، – دەگەن باسقارما باسشىسى، اۋىلدىق جەرلەردەگى ۇكىمەتتىك ەمەس ۇيىمداردىڭ باستامالارىن قولداۋعا وبلىس اكىمدىگى تاراپىنان قولداۋعا دايىن ەكەنىن جەتكىزدى.
بۇگىندە الەمنىڭ كوپتەگەن ەلىنىڭ ساياساتىندا ۇكىمەتتىك ەمەس ۇيىمداردىڭ ءرولى ەرەكشە سيپاتقا يە. ويتكەنى مەملەكەتتىك باسقارۋ جۇيەسىنە قوعامدىق قاۋىمداستىقتى ارالاستىرماي تۇيتكىلدى ماسەلەلەردى شەشۋ مۇمكىن ەمەس. ساراپشىلاردىڭ باعالاۋىنشا، قازاقستانداعى ءۇشىنشى سەكتور الەمدىك ترەندتەر باعىتىندا دامىپ كەلەدى. ياعني ەلىمىزدەگى ءۇشىنشى سەكتوردى قولداۋ مەملەكەت تاراپىنان دا، ءبىرقاتار ءىرى كومپانيانىڭ قايىرىمدىلىق ماقساتتاعى ۇەۇ ارقىلى دا جۇزەگە اسۋدا.
