تۇركىستان وبلىسىندا 2025 جىلى «اۋىل – ەل بەسىگى» جوباسى اياسىندا 142 ەلدى مەكەندە 140 جوبانى (54 – وتپەلى، 86 – جاڭا جوبالار) ىسكە اسىرۋعا 21،8 ملرد. تەڭگە ءبولىندى، دەپ حابارلايدى Dalanews.kz
اتاپ ايتقاندا، وسى قارجى ارقىلى 7 مەكتەپ كۇردەلى جوندەۋدەن وتسە، 17 سپورت نىسانىنىڭ قۇرىلىسى جانە 1 سپورت مەكتەبىنىڭ كۇردەلى جوندەۋ جۇمىستارى جۇرەدى. 10 مادەنيەت نىسانى سالىنىپ، 6 نىسان كۇردەلى جوندەۋدەن وتەدى. سونىمەن بىرگە 2 اۋىز سۋ نىسانى كۇردەلى جوندەۋدەن ءوتىپ، 7 ەلەكتر قۋاتىمەن جابدىقتاۋ نىسانىنىڭ قۇرىلىسى جۇرەدى. 90 جوبا ىشكى كوشەلەردى ورتاشا جوندەۋگە باعىتتالعان.
اتالعان جوبا اياسىنداعى جۇمىستار وبلىس اكىمى اپپاراتىنىڭ اپتالىق ماجىلىسىندە تالقىلاندى. ءوڭىر باسشىسى نۇرالحان كوشەروۆ جاۋاپتىلارعا مىندەتتەرىن ساپالى اتقارۋدى تاپسىردى.
– «اۋىل – ەل بەسىگى» جوباسى اياسىنداعى جۇمىستاردى ۋاقتىلى ءارى ساپالى اياقتاۋدى تاپسىرامىن. جەرگىلىكتى تۇرعىنداردى جۇمىسپەن قامتۋ كەرەك. ءاربىر جوبا زەردەلەنىپ، قاداعالانادى. جالپى وبلىس اۋماعىنداعى قۇرىلىس نىساندارىنىڭ ءبارى باقىلاۋدا تۇر. وبلىستىق باسقارما باسشىلارى مەن اۋدان، قالا اكىمدەرى جۇمىستى شيراتىپ، ساپالى اتقارسىن. ايماقتى دامىتۋ جوسپارى، ينديكاتورلاردىڭ ورىندالۋى بويىنشا ارنايى زەردەلەۋ جۇرگىزىلەدى، – دەدى نۇرالحان كوشەروۆ.
ماجىلىستە ءوڭىردى اۋىز سۋمەن قامتۋ جانە «جايلى مەكتەپ» جوباسىن جۇزەگە اسىرۋ ماسەلەلەرى دە تالقىلاندى. تۇركىستان وبلىسىنداعى قالالار اۋىز سۋمەن تولىق قامتىلسا، اۋىلداردىڭ قامتۋ كورسەتكىشى جىل سايىن ۇلعايىپ كەلەدى. ارىس، شاردارا، لەنگىر، سارىاعاش قالالارىنداعى اۋىز سۋ جۇيەلەرىن رەتتەۋ ماسەلەسى ايتىلىپ، ءتيىستى ۇسىنىستار بەرىلدى. اۋىز سۋمەن قامتۋ بويىنشا وبلىستا 63 جوبا جۇزەگە اسىرىلۋدا. ونىڭ 7-ەۋى قالادا بولسا، 56 جوبا اۋىلداردا جۇزەگە اسپاق. بيىل 36 جوبا جۇزەگە اسىپ، 30 ەلدى مەكەن ساپالى اۋىز سۋمەن قامتىلسا، 7 ەلدى مەكەننىڭ سۋ قۇبىرلارى جاڭارتىلادى. 2 ەلدى مەكەنگە سۋ قۇبىرلارى سالىنادى.
وبلىستا «جايلى مەكتەپ» جوباسى ارقىلى 29 مەكتەپتىڭ قۇرىلىسى جوسپارلانسا، بۇگىندە 13 مەكتەپ تاپسىرىلعان. 9 مەكتەپتە وقۋ پروسەسى باستالعان. بيىل قالعان 16 مەكتەپ تاپسىرىلادى دەپ كۇتىلىپ وتىر. ءبىلىم ۇيالارىنىڭ قۇرىلىسى وبلىس اكىمىنىڭ قاتاڭ باقىلاۋىنا الىنعان. مەكتەپتەردى بىلىكتى باسشىلارمەن جانە ۇستازدارمەن قامتۋ جۇمىسى دا نازاردا تۇر.
