تۇركىستان وبلىسى اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا وتىرىسى ءوتتى. ماجىلىسكە وبلىس اكىمىنىڭ ورىنباسارى بەيسەنباي تاجىبايەۆ ءتوراعالىق ەتىپ، جۇرگىزىپ وتىردى. جيىنعا كوميسسيا مۇشەلەرى، قۇقىق قورعاۋ ورگادارى وكىلدەرى، اۋدان جانە قالالىق كوميسسيا ءتوراعالارى سەلەكتورلىق فورماتتا قاتىستى. كۇن تارتىبىندە 4 ماسەلە قارالىپ، باياندامالار جاسالدى،- دەپ حابارلايدى Dalanews.kz
— مەملەكەت گەندەرلىك تەڭدىكتى قامتاماسىز ەتۋ، وتباسىلىق ينستيتۋتتى نىعايتۋ، انا مەن بالا قۇقىعىن قورعاۋ، تۇرمىستىق زورلىق-زومبىلىقتىڭ الدىن الۋ جانە الەۋمەتتىك قولداۋ باعىتىندا اۋقىمدى جۇمىستاردى اتقارۋدا. تۇركىستان وڭىرىندە يگىلىكتى باستامالار مەن جوبالار جۇزەگە اسىرىلىپ كەلەدى. ايەلدەر قاۋىمى سان ءتۇرلى سالانى مەڭگەرىپ، ەڭبەكتەنىپ، ەلدى دامىتۋعا ۇلەس قوسۋدا. بۇگىن ءجيى كەزدەسەتىن ماسەلەلەردى ورتاعا سالۋ، ۇسىنىستاردى تالقىلاۋ جانە شەشىلۋ جولدارىن قاراستىرۋ ءۇشىن جينالدىق. سىزدەر قوعامدا بەلسەنە ءىس اتقارىپ، پروبلەمالاردىڭ وشاقتارىن ءجىتى بىلەسىزدەر. سوندىقتان پىكىرلەرىڭىزدى تىڭداۋ - ماڭىزدى. ەرتە جۇكتىلىكتىڭ الدىن الۋ شارالارىنىڭ ناتيجەسىندە كورسەتكىش تومەندەدى. دەگەنمەن كامەلەتكە تولماعاندار اراسىندا جانە ولارعا جاسالاتىن قۇقىقبۇزۋشىلىق ازايماي وتىر. كوبىنە الەۋمەتتىك جەتىسپەۋشىلىك پەن وتباسىلىق جانجالدان تۋىندايدى. سونداي-اق قاداعالاۋدى جازعى دەمالىستا دا ەلەۋسىز قالدىرماعان ابزال. ءبىلىم ۇيالارىنان باستاپ كوللەدجدەرگە دەيىن، جالپى جەرگىلىكتى جەرلەردە باقىلاۋدى كۇشەيتىپ، جۇمىستى جانداندىرۋدى تاپسىرامىن، - دەدى بەيسەنباي داۋلەت ۇلى.
ستاتيستيكالىق دەرەكتەرگە سۇيەنسەك، 2025 جىلدىڭ 7 ايىندا جۇرگىزىلگەن تالداۋ ناتيجەسىندە كامەلەتكە تولماعاندارمەن 69 قىلمىس بولعان. وسىعان بايلانىستى تۇركىستان وبلىسىنىڭ پسيحولوگيالىق قولداۋ ورتالىعى» كمم، 17 اۋدان جانە قالالىق «وتباسىن قولداۋ ورتالىعى» كمم اشىلىپ، ءتيىستى مىندەتتەردى ورىنداۋدا. بۇل ورتالىقتار ومىرلىك قيىن جاعدايعا تاپ بولعان تۇرعىندارعا جان-جاقتى كومەكتەسۋدە. جىل باسىنان بەرى 17 ورتالىققا 3800-دەي ءوتىنىش كەلىپ ءتۇسىپ، ءتۇرلى باعىتتا 5 مىڭنان اسا قىزمەت كورسەتىلدى. وتباسىن قولداۋ ورتالىقتارىندا جالپى 284،5 شتاتتىق بىرلىك بەكىتىلىپ، ءتيىستى ماماندار ەڭبەك ەتۋدە.
ايتا كەتەيىك، تۇركىستان وبلىسىندا حالىق سانى - 2،1 ملن ادام. ونىڭ 49 پايىزى – ايەلدەر. رەسپۋبليكادا كوپبالالى انالاردىڭ 185 مىڭنان استامى تۇركىستان ءوڭىرىنىڭ تۇرعىندارى. بۇگىندە ايماقتا 55 مىڭنان استام ادام نەمەسە 8935 وتباسى اتاۋلى الەۋمەتتىك كومەك الادى. جيىندى قورىتىندىلاعان وبلىس اكىمىنىڭ ورىنباسارى ءبىرقاتار تاپسىرمالاردى جۇكتەدى.
