– تۇركىستان وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتى ايماقتاعى 901 مەكتەپكە جانە اۋداندىق، قالالىق ءبىلىم بولىمدەرىنە مونيتورينگ جۇرگىزدى. كەشەندى مونيتورينگتىڭ قورىتىندىسى ءبىلىم ۇيالارىندا جەكەلەگەن پروبلەمالىق ماسەلەلەردىڭ بار ەكەنىن كورسەتتى. ماسەلەن، وبلىستاعى 900 مەكتەپتىڭ 800-گە جۋىق مەكتەبىندە مەديسينالىق كابينەت بار. الايدا، ونىڭ 100-دەن اسا مەكتەپتەگى مەديسينالىق كابينەتكە ليسەنزيا قوسىمشاسى الىنباعان. سونداي-اق، 88 باستاۋىش جانە شاعىن جيناقتى باستاۋىش مەكتەپتەردە مەديسينالىق كابينەت جوق، – دەدى ق.قايىپبەك ۇلى.
سونىمەن قاتار، دەپارتامەنت ماماندارى ءبىرقاتار مەكتەپتەردە حيميا، بيولوگيا، فيزيكا كابينەتتەرىمەن جاراقتاندىرىلماعانىن انىقتاعان.
ودان بولەك، 200-گە جۋىق مەكتەپتەگى باستاۋىش، نەگىزگى جانە جالپى ورتا ءبىلىم بەرۋ ۇيىمدارىنىڭ سپورت زال مەن سپورت الاڭدارى جابدىقتارمەن جانە جيھازبەن جاراقتاندىرۋ نورمالارىنا سايكەس ەمەس دەپ تاپقان.
قۇدايبەرگەن قايىپبەك ۇلى جاڭا وقۋ جىلىندا ورىن الاتىن جاڭالىقتارىمەن دە ءبولىستى. بيىلدان باستاپ 1-سىنىپ وقۋشىلارى «الىپپە» وقۋلىعىمەن ساۋات اشسا، وقۋشىلارعا مەكتەپكە بىردەي فورما كيىپ بارۋ مىندەتتەلمەيدى. مەكتەپ كيىمى ىڭعايلى ىسكەرلى، كلاسسيكالىق ستيلدە بولسا بولعانى.
