كٷنٸ كەشە عانا اتالعان باعدارلامانىڭ ٷشٸنشٸ باعىتى شەڭبەرٸندە تٷركٸستان وبلىسى, سايرام اۋدانىنان سولتٷستٸك ٶڭٸرگە قونىس اۋدارۋعا نيەت بٸلدٸرگەن 45 وتباسى (سارىاعاش, سايرام, بەيدٸبەك اۋداندارى) مٷشەلەرٸ پاۆلودار مەن سولتٷستٸك قازاقستان وبلىستارىنىڭ تىنىس-تٸرشٸلٸگٸمەن تانىسۋ ماقساتىندا جولعا شىقتى. ولار ەكٸ وبلىستاعى جاعدايدى جان-جاقتى ساراپتايدى. ەگەر ۇسىنىس ۇناسا, ول تۇرعىندار سولتٷستٸككە كٶشۋٸ مٷمكٸن.
قونىس اۋدارۋعا نيەت بٸلدٸرٸپ, جولعا شىققان تۇرعىندارعا «Nur Otan» پارتيياسى تٷركٸستان وبلىستىق فيليالى تٶراعاسىنىڭ بٸرٸنشٸ ورىنباسارى بەيسەنباي تەجٸباەۆ سولتٷستٸك ٶڭٸرلەرگە وڭتٷستٸك حالقىنىڭ قونىس اۋدارۋىنىڭ ستراتەگييالىق ماڭىزدىلىعىن, مەملەكەت تاراپىنان كٶرسەتٸلەتٸن قولداۋلاردى اتاپ ٶتٸپ, جەرلەستەرٸمٸزگە سەت-ساپار تٸلەدٸ.
سولتٷستٸك وبلىستارعا كٶش-قون باعدارلاماسى باستالعان 5 جىلدىڭ ٸشٸندە 20 مىڭداي ادام كٶشٸپ بارعان. ونىڭ 6 مىڭى – تٷركٸستان وبلىسىنىڭ تۇرعىندارى. ياعني 1700 وتباسى قونىس اۋدارعان.
سەۋٸر ايىنىڭ باسىندا ٷكٸمەت وتىرىسىندا سولتٷستٸك قازاقستان وبلىسىنىڭ 2025 جىلعا دەيٸن دامۋ باعدارلاماسى قابىلداندى. ەندٸ بۇل ايماققا جالپى كٶلەمٸ 2 ترلن تەڭگە ينۆەستيتسييا سالىنباق.
اۋىل شارۋاشىلىعى بويىنشا 52 سٷت فەرماسى, 2 تاۋىق فابريكاسى بوي كٶتەرەدٸ. «قىزىلجار» ترانسپورت حابى ٸسكە قوسىلادى. باسقا ايماقتارمەن بايلانىستى ارتىرىپ, بارىس-كەلٸستٸ بارىنشا كٷشەيتۋ ٷشٸن ەۋە قاتىناسىن ايىنا 16-دان 68 رەيسكە دەيٸن ارتتىرۋ جوسپارلانۋدا. سونىمەن قاتار وبلىستىق جاڭا اۋرۋحانا, اۋدانداردا 47 مەديتسينالىق نىسان, تۇرعىندار ٷشٸن 21 مىڭ پەتەر مەن 16 مەكتەپ سالىنادى. نازارباەۆ ۋنيۆەرسيتەتٸنٸڭ نەگٸزٸندە جاڭا ۋنيۆەرسيتەت ٸسكە قوسىلادى. وسى جوسپار بويىنشا 26 مىڭ جاڭا جۇمىس ورنى اشىلادى دەپ كٷتٸلۋدە. بۇل باستامالار "Nur Otan" پارتيياسىنىڭ سايلاۋالدى باعدارلاماسىنا ەنگٸزٸلگەن.
سولتٷستٸك ٶڭٸرلەرگە قونىس اۋدارۋشىلارعا مەملەكەت تاراپىنان جاسالاتىن قولداۋلار تۋرالى اقپاراتتى اۋداندىق جۇمىسپەن قامتۋ ورتالىقتارىنان الۋعا بولادى.
