«قازاقستان تەمىر جولى» اق اقپاراتىنا سايكەس، سوڭعى مالىمەت بويىنشا سارىاعاش اۋدانىنىڭ تۇيىقتارىندا 17 ۆاگون كومىر بار. وبلىسقا قوسىمشا 242 ۆاگون جولدا كەلە جاتىر. ونىڭ ىشىندە سارىاعاش اۋدانىنا قوسىمشا 70 ۆاگون جەتكىزىلمەك. جىلىتۋ ماۋسىمىنىڭ بارىسى باقىلاۋعا الىنعان جانە شتاتتىق رەجيمدە ءوتىپ جاتىر.
سوڭعى كەزدەرى جىلىجاي يەلەرى تاراپىنان ارزان كومىر تاپشىلىعى جونىندە ماسەلە كوتەرىلۋدە. جىلىجايلار جەكە بيزنەس سۋبەكتىسى بولعانىمەن وبلىس اكىمدىگى تاراپىنان وسى سالاداعى كاسىپكەرلەردى قولداۋ، جىلىجايلاردى قولجەتىمدى باعاداعى كومىرمەن قامتۋ شارالارى جوسپارلانىپ جاتىر.
– ەلىمىزدىڭ يندۋستريا جانە ينفراقۇرىلىمدىق دامۋ مينيسترلىگى تاراپىنان جىلىجايلاردى بيزنەس سۋبەكتىسى رەتىندە بولەك شىعارۋ جونىندە، ياعني ولار كەن ورنىنان جەكە وزدەرى ساتىپ الۋ كەرەك، دەگەن ۇسىنىس بار. ءبىراق وعان قاراماستان، جوسپاردا جەكە تۇرعىندارمەن قاتار جىلىجايلاردى قامتۋ دا بار، – دەيدى تۇركىستان وبلىسى ەنەرگەتيكا جانە تۇرعىن ۇي-كوممۋنالدىق-شارۋاشىلىق باسقارماسىنىڭ ءبولىم باسشىسى مارات بايعۇنىسوۆ.
تۇركىستان وبلىسى كولەمىنە جالپى كومىر وتىنىنىڭ قاجەتتىلىگى 900 مىڭ توننادان اسادى. ونىڭ ىشىندە كوممۋنالدىق-تۇرمىستىق سالاعا 250 مىڭ توننا كومىر قاجەت. تۇرعىنداردىڭ قاجەتتىلىگى: (جىلىجايلار مەن جەكە تۇرعىن ۇيلەر) 658،4 مىڭ توننا. تاسىمالدانعانى 605 مىڭ توننا نەمەسە 92%.
تۇركىستان وبلىسىندا بىلتىر 101 گەكتارعا جىلىجاي سالىنىپ، جالپى كولەمى 1625 گەكتاردى قۇرادى. بۇل – رەسپۋبليكاداعى جالپى جىلىجايلاردىڭ 71 پايىزى.
