«Qazaqstan temir joly» AQ aqparatyna sáikes, sońǵy málimet boiynsha Saryaǵash aýdanynyń tuiyqtarynda 17 vagon kómir bar. Oblysqa qosymsha 242 vagon jolda kele jatyr. Onyń ishinde Saryaǵash aýdanyna qosymsha 70 vagon jetkizilmek. Jylytý maýsymynyń barysy baqylaýǵa alynǵan jáne shtattyq rejimde ótip jatyr.
Sońǵy kezderi jylyjai ieleri tarapynan arzan kómir tapshylyǵy jóninde másele kóterilýde. Jylyjailar jeke biznes sýbektisi bolǵanymen oblys ákimdigi tarapynan osy saladaǵy kásipkerlerdi qoldaý, jylyjailardy qoljetimdi baǵadaǵy kómirmen qamtý sharalary josparlanyp jatyr.
– Elimizdiń Indýstriia jáne infraqurylymdyq damý ministrligi tarapynan jylyjailardy biznes sýbektisi retinde bólek shyǵarý jóninde, iaǵni olar ken ornynan jeke ózderi satyp alý kerek, degen usynys bar. Biraq oǵan qaramastan, josparda jeke turǵyndarmen qatar jylyjailardy qamtý da bar, – deidi Túrkistan oblysy energetika jáne turǵyn úi-kommýnaldyq-sharýashylyq basqarmasynyń bólim basshysy Marat Baiǵunysov.
Túrkistan oblysy kólemine jalpy kómir otynynyń qajettiligi 900 myń tonnadan asady. Onyń ishinde kommýnaldyq-turmystyq salaǵa 250 myń tonna kómir qajet. Turǵyndardyń qajettiligi: (jylyjailar men jeke turǵyn úiler) 658,4 myń tonna. Tasymaldanǵany 605 myń tonna nemese 92%.
Túrkistan oblysynda byltyr 101 gektarǵa jylyjai salynyp, jalpy kólemi 1625 gektardy qurady. Bul – respýblikadaǵy jalpy jylyjailardyń 71 paiyzy.
