وڭىردەگى سۋ قويمالارى مەن وزەندەردىڭ سۋ رەجيمىنە كۇندەلىكتى مونيتورينگ جۇرگىزىلۋدە. جالپى وبلىس بويىنشا سۋ قويمالاردىڭ ورتاشا تولۋى 40-45 پايىزدى قۇرايدى. تاسقىن سۋلاردى قابىلداۋعا جەتكىلىكتى قورلار بار، ال وزەندەردەگى سۋدىڭ ءوتۋى ورتا دەڭگەيدەن تومەن.
سونىمەن قاتار، ايماقتاعى تاسقىن ءقاۋپى جاعدايىن انىقتاۋ ماقساتىندا تاۋداعى مۇزدىق كولدەردىڭ جانە قار قورىنىڭ جاعدايىنا اەروۆيزۋالدى جانە جەر ءۇستى زەردەلەۋ جۇمىستارى ۇيىمداستىرىلدى. زەرتتەۋلەر ناتيجەسىندە بيىل وتكەن جىلمەن سالىستىرعاندا قاردىڭ ءتۇسۋى 13 پايىزعا تومەن ەكەنى انىقتالعان.
ودان بولەك، توتەنشە جاعدايلار دەپارتامەنتى تۇرعىن ۇيلەردىڭ ءورت قاۋىپسىزدىگىن جانە تۇرعىنداردىڭ ۋلى گازدان ۋلانۋدىڭ الدىن الۋ ماقساتىدا دا ءبىرقاتار جۇمىستار اتقارۋدا. جىل باسىنان بەرى اپتانىڭ ءار سەنبىسى وبلىس اۋماعىندا «تۇرعىن ۇيدە ءورت قاۋىپسىزدىگى» كۇنى بولىپ بەلگىلەندى. وسى كۇنى دەپارتامەنت گارنيزونىنىڭ بارلىق جەكە قۇرامى قالا، اۋىل، ەلدى مەكەندەردەگى تۇرعىن ۇيلەردى ارالاپ ۋلى گازدان ۋلانۋدىڭ الدىن الۋ جانە ءورت قاۋىپسىزدىگىن ءتۇسىندىرۋ جۇمىستارىن جۇرگىزۋدە.
2018-2019 جىلعى جىلىتۋ ماۋسىمى باستالعالى ماماندار 76 مىڭنان استام تۇرعىن ءۇيدى ارالاپ، 302 مىڭعا جۋىق ادامعا ءتۇسىندىرۋ جۇمىستارىن جۇرگىزگەن. سونىمەن قاتار، بۇقارالىق اقپارات قۇرالدارىنان ارنايى بەينەروليكتەر كورسەتىلىپ، قاۋىپسىزدىك شارالارى ەسكەرتىلۋدە.
تۇركىستان وبلىسى اكىمىنىڭ باسپا ءسوز قىزمەتى
