تۇركىستان وبلىسىندا تۋريزم جانە مادەنيەت سالالارىنا ينۆەستيسيا تارتۋ جۇمىستارى جان-جاقتى جۇرگىزىلىپ كەلەدى. بۇگىن تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ تۇركيا مەملەكەتىنىڭ «Albayrak Media Group» كومپانياسىنىڭ ماڭىزدى تۇلعاسى جانە «Yeni Şafak» گازەتىنىڭ حالىقارالىق ءبولىمىنىڭ ديرەكتورى ومەر كابلانمەن كەزدەستى،- دەپ حابارلايدى Dalanews.kz
تاراپتار تۇركىستان ءوڭىرىن الەمدىك دەڭگەيدە تانىتۋ ماقساتىندا بىرلەسكەن جوبالاردى جۇزەگە اسىرۋ جايىن كەڭىنەن تالقىلادى.
وبلىس اكىمىنىڭ ءبىرىنشى ورىنباسارى تۇركىستاندا تۋريزم قارقىندى دامىپ كەلە جاتقانىن تىلگە تيەك ەتىپ، بۇل باعىتتاعى جاڭا باستامالارعا قولداۋ بىلدىرەتىنىن جەتكىزدى.
"ورتاق تاريحي قۇندىلىقتارىمىز ءبىزدى ودان ءارى جاقىنداستىرادى. ءسىزدىڭ مەديا سالاسىنداعى مول تاجىريبەلەرىڭىز جانە ىقپالىڭىز ءبىز ءۇشىن وتە ماڭىزدى. تۇركىستان وبلىسى – ەلىمىزدىڭ تاريحىندا ايرىقشا ورنى بار، مادەنيەت پەن ءداستۇردى ساقتاپ، دامۋ مەن جاڭعىرۋ جولىندا ۇلكەن قادامدار جاساپ كەلە جاتقان ايماق. بۇگىندە بىرەگەي تاريحي جانە مادەني ەسكەرتكىشتەرمەن، كوركەم تابيعي لاندشافتتارمەن جانە ساۋىقتىرۋ كەشەندەرىمەن تۋريستەردىڭ قىزىعۋشىلىعىن ارتتىرۋدا. ءبىز وبلىسىمىزدى الەمدىك دەڭگەيدە تانىتۋ ماقساتىندا حالىقارالىق سەرىكتەستەرمەن ارىپتەستىك ورناتىپ، جاڭا باستامالاردى جۇزەگە اسىرۋعا دايىنبىز. بۇگىنگى كەزدەسۋىمىز ەكىجاقتى ىنتىماقتاستىق ءۇشىن جاڭا مۇمكىندىكتەر اشىپ، ورتاق جوبالاردى جۇزەگە اسىرۋعا سەرپىن بەرەدى دەپ ۇمىتتەنەمىن. سىزدەرمەن ءارى قاراي سەرىكتەستىك ورناتۋعا جانە ورتاق ماقساتتارعا جەتۋ ءۇشىن بىرلەسىپ جۇمىس ىستەۋگە دايىنبىز"، – دەدى زۇلپىحار جولداسوۆ.
ومەر كابلان تۇركىستان جايلى جوباسىن تانىستىرىپ، مەديا سالاسىندا تاجىريبە الماسۋعا دايىن ەكەنىن جەتكىزدى.
"ەكى ەلگە ءبىر-بىرىمىزدىڭ مادەنيەتىمىزدى كەڭىنەن تانىستىرۋعا دايىنبىز. سونىمەن قاتار تۇركىستاندى الەمگە تانىتۋ باعىتىندا ۇلكەن جوبالار بار. العاشقى باستاما رەتىندە تۇركىستاننىڭ مادەنيەتى مەن ءداستۇرى، حالقىنىڭ كۇندەلىكتى تۇرمىس-تىرشىلىگى، قىزىقتى دەرەكتەر مەن تۋريستىك نىساندار تۋرالى زامان تالابىنا ساي فيلم ءتۇسىرۋدى كوزدەپ وتىرمىز. فيلمدەرگە بىرنەشە تىلدە دۋبلياج جاساۋعا مۇمكىندىگىمىز بار. تۇركىستاندى الەمگە تانىتۋ ءۇشىن ۇزدىك مەديا پلاتفورمالارىمىزدى پايدالانامىز. ودان بولەك، وقىتۋ جانە تاجىريبە الماسۋ سەمينارلارىن ۇيىمداستىرۋدى جوسپارلاپ وتىرمىز"، – دەدى مەديا كومپانيا وكىلى.
وبلىس اكىمىنىڭ ورىنباسارى ەرتاي التايەۆ باستى ماقسات – ۇلتارالىق ىنتىماقتاستىقتى نىعايتۋ ەكەنىن اتاپ ءوتىپ، تۇركى دۇنيەسى تۋرالى الەمدىك پلاتفورمالارعا شىعارۋ باعىتىندا بىرگە جۇمىس ىستەۋگە دايىن ەكەنىن ايتتى.
كەزدەسۋ بارىسىندا تۇركىستان وبلىسى اكىمدىگى مەن تۇركيانىڭ «Albayrak Media Group» كومپانياسى اراسىنداعى ارىپتەستىكتى نىعايتۋ تۋرالى مەموراندۋمعا قول قويىلدى. بۇل قۇجات ەكى ەل اراسىنداعى ەكونوميكالىق-مادەني بايلانىستارعا جاڭا سەرپىن بەرەدى دەپ كۇتىلۋدە.
«Albayrak Media Group» – تۇركياداعى ەڭ ىقپالدى مەديا حولدينگتەردىڭ ءبىرى جانە ەلدىڭ اقپاراتتىق كەڭىستىگىندە ماڭىزدى ءرول اتقاراتىن كومپانيا.
ايتا كەتەيىك، وسىعان دەيىن تۇركىستان وبلىسىنىڭ دەلەگاسياسى تۇركيانىڭ ىستانبۇل قالاسىنا ىسساپارمەن بارىپ، TURSAB تۋريستىك ۇيىمىنا مۇشە كومپانيالارمەن كەزدەسكەن بولاتىن.
