تۇركىستان وبلىسىنىڭ كيەلى جەرلەرىنە زيارات جاساعىسى كەلەتىن يندونەزيالىق مۇسىلماندار سانى ارتۋدا. بۇل تۋرالى دجاكارتا قالاسىندا تۇركىستان وبلىسى دەلەگاتتارى مەن يندونەزيا ەلىنىڭ تۋروپەراتورلارى اراسىندا وتكىزىلگەن كەزدەسۋ بارىسىندا ءمالىم بولدى.

يندونەزيالىق زياراتشىلار اسىرەسە، تۇركىستان وڭىرىندە ورنالاسقان ارىستان باب جانە قوجا احمەت ياسساۋي كەسەنەلەرىنە، اڭىز بويىنشا مۇحاممەد پايعامباردىڭ ساحاباسى بولعان ۇكاش اتانىڭ قۇدىعى، قۇپياسى مەن سىرى مول الىپ «اق مەشىت» ۇڭگىرىنە وتە قىزىعۋشىلىق تانىتادى ەكەن.

جىل سايىن ساۋد ارابياسىنا ۋمرا جانە قاجىلىق جاساۋعا يندونەزيادان ميلليونداعان مۇسىلماندار اعىلىپ كەلەدى. ۋمرا عيباداتىن ورىنداعاننان كەيىن زياراتشىلاردىڭ باسىم بولىگى ورتالىق ازيانىڭ كيەلى ورىندارىنا ساپار شەگەدى.

«تۇركىستان» اكك» اق فيليالى «Turkistan Invest» سىرتقى بايلانىستار جونىندەگى باسقارۋشى ديرەكتورى بايان كايۋپوۆانىڭ ايتۋىنشا، كەلىسسوزدەر ءساتتى بولعان.

«ورتالىق ازيا ەلدەرىنە جاسالاتىن تۋرمارشرۋتتارعا وزبەكستانداعى ەجەلگى بۇقارا، سامارقاند قالالارى، يوردانياداعى جارتاستا سوعىلعان پەترا قالاسى، جانە وزگە دە ەلدەر ەنگەن. ەندىگى كەزەكتە باراتىن جەردىڭ گەوگرافياسى كەڭەيەدى. وعان تۇركىستان وبلىسىنىڭ كيەلى نىساندارى ەنەدى دەپ جوسپارلانۋدا»، – دەيدى ول.

كەلىسسوزدەر بارىسىندا يندونەزيالىقتار تاراپى الماتى مەن دجاكارتا قالالارى اراسىندا تىكەلەي اۋە بايلانىسىن اشۋدى ۇسىندى. بۇگىنگى تاڭدا الماتىدان دجاكارتاعا مالايزيا استاناسى كۋالا-لۋمپۋر ارقىلى عانا ۇشىپ بارۋعا بولادى.

يندونەزيا پرەزيدەنتىنىڭ ارنايى وكىلى اداتيا پەردونا «دجاكارتا-الماتى تىكەلەي اۋە رەيسىن اشۋ سىزدەردىڭ وڭىرلەرىڭىزگە باراتىن تۋريستەردىڭ، ونىڭ ىشىندە زياراتشىلاردىڭ سانىن ارتتىرۋعا ۇلكەن سەرپىلىس بەرەدى. بۇگىندە يندونەزيادا 270 ملن. جۋىق تۇرعىن ءومىر سۇرەدى، ونىڭ 90 پايىزىن مۇسىلماندار قۇرايدى. مەنىڭ ويىمشا، ءبىزدىڭ زياراتشىلاردىڭ كوبىسى تۇركىستانعا بارۋ مۇمكىندىگىن مىندەتتى تۇردە پايدالانادى»، – دەدى ول.

بۇل كەزدەسۋ تۇركىستان وبلىسى دەلەگاسياسىنىڭ مالايزيا جانە يندونەزيا مەملەكەتتەرىنە جاساعان روۋد-شوۋى اياسىندا ءوتتى. دەلەگاتتار قاتارىندا: تۇركىستان وبلىسىنىڭ تۋريزم جانە سىرتقى بايلانىستار باسقارماسى، «تۇركىستان» اكك» اق فيليالى – «Turkistan Invest» كومپانياسى، تۇركىستان وبلىسىنىڭ تۋريزم يندۋسترياسىن دامىتۋ اسسوسياسياسى، «Turkistan Tourism Center» اقپاراتتىق ورتالىعى،  «Aray Deluxe Thermal Resort» شيپاجايى جانە دە «Sky Way»، «تۋركەستان ەليت تۋر»، «ەكسپەديسيا يۋگ» تۋريستىك وپەراتورلارى بولدى. ءىسساپار تۇركىستان وبلىسىنىڭ تۋريزم جانە سىرتقى بايلانىستار باسقارماسىنىڭ ۇيىمداستىرۋىمەن ءوتتى.

 

تۇركىستان وبلىسى اكىمىنىڭ باسپا ءسوز قىزمەتى