تۇركىستان وبلىسى، ورداباسى اۋدانىندا تۇركىستان ماگيسترالدى كانالىنا كۇردەلى  جوندەۋ جۇمىستارى ءجۇرىپ جاتىر. نىسان پايدالانۋعا بەرىلگەندە سۋارمالى جەرلەردىڭ كولەمى ارتىپ، شارۋالار تىرشىلىك ءنارىن ۇزدىكسىز پايدالاناتىن بولادى.

بىلتىر قاراشا ايىندا باستالعان قۇرىلىس جۇمىستارى جىل اياعىنا دەيىن اياقتالۋى ءتيىس. قۇرىلىس بارىسى ءوڭىر تىلشىلەرىنە تانىستىرىلدى.

بىرەر ايدىڭ ىشىندە نىساندى تولىقتاي اياقتاپ ءبىتۋى ءتيىس قۇرىلىسشىلاردىڭ جۇمىسى قىز-قىز قايناپ جاتىر. كانالدى جوندەۋگە رەسپۋبليكالىق بيۋدجەتتەن 1 ملرد. 760 ملن. تەڭگە قارالعان.

سۋ قويمانىڭ جوبالىق كولەمى 370 ملن/م3، جاعا جيەگىنىڭ ۇزىندىعى – 35 شاقىرىمنان اسادى. قۇرىلىس جۇمىستارىنا باس-اياعى 80-نەن استام جۇمىسشى جۇمىلدىرىلعان.

– جوندەۋ جۇمىستارىن 20 جەلتوقسانعا دەيىن اياقتايمىز. ءقازىر كانالدىڭ 2 جارىم شاقىرىمى بەتوندالدى. قالعانىن مەجەلى ۋاقىتتا بىتەمىز. جۇمىسشىلار جەرگىلىكىتى تۇرعىندار، – دەدى بولىك باسشىسى ءسابيت نۇركىشيەۆ.

جەرگىلىكتى بيلىك وكىلدەرى شارۋالار ەندى اعىن سۋدان تاپشىلىق كورمەيتىنىن ايتۋدا. سۋارۋ ماۋسىمىندا تىرشىلىك نارىنەن تارشىلىق كورەتىن تۇركىستاندىق، ورداباسىلىق ديحانداردىڭ ماسەلەسى شەشىلگەن دەسەك بولادى. نىسان جوندەۋدەن وتكەننەن كەيىن كانالدىڭ سۋ وتكىزۋ مۇمكىندىگى ارتىپ، جاپسارلاس اۋىلداردى سۋ الۋ ءقاۋپىنىڭ دە بەتى قايتادى.

– جەردىڭ بەتىنە دەيىن سۋ شىعىپ كەتەتىن. بىلتىر 44 ۇڭعىما پايدالانۋعا بەردىك. الداعى ۋاقىتتا 11- ءىن پايدالانۋعا بەرەمىز. وسىلايشا جەر استى سۋىپ رەتتەپ، سۋدى ۇنەمدەيمىز، – دەيدى بوگەن اۋىلدىق وكرۋگىنىڭ اكىمى شامەت بەكتاي.

جالپى ورداباسى اۋدانىندا 75 مىڭ گەكتارعا ەگىستىك ەگىلگەن. اۋدان بويىنشا قازىرگى تاڭدا 6 مىڭعا جۋىق جەر پايدالانۋشى بار. ەگىستىكتەرگە 85 كانال ارقىلى سۋ جەتكىزىلدى. ونىڭ 4ء-ۋى — رەسپۋبليكالىق، 72ء-سى كوممۋنالدىق، 9-ى — جەكە مەنشىك يەلىگىندە. جىل باسىنان بەرى سۋارمالى جەرلەردىڭ اۋقىمىن كەڭەيتۋ ماقساتىندا 6 كانال اعىمداعى جوندەۋدەن ءوتىپتى. بۇل جۇمىستار 1500 گەكتارعا جۋىق سۋارمالى جەردى اينالىمعا قوسۋعا مۇمكىندىك بەرگەن.

 

«Dalanews» اقپارات