بۇگىن تۇركىستان وبلىسىنىڭ ورتالىعى – تۇركىستان قالاسىندا وبلىس اكىمى جانسەيىت تۇيمەبايەۆتىڭ قاتىسۋىمەن جاڭا اكىمشىلىك-ىسكەرلىك ورتالىقتا ورنالاسقان «تۇركىستان – جاڭا قالا» تۇرعىن ءۇي الابىنىڭ قازىعىن قاعىپ، ىرگەتاسىن قالاۋ ءراسىمى ءوتتى.

"ءقادىرلى تۇركىستاندىقتار! ەلباسى جارلىعىمەن وبلىس ورتالىعى كونە تۇركىستانعا اۋىسقالى ۇلكەن وزگەرىستەرگە بەت بۇردىق. قازىرگى تاڭدا تۇركىستان قالاسىن دامىتۋ بويىنشا ءىرى جوبالار قولعا الىنۋدا. سولاردىڭ كەزەكتىسى – 88 ءۇيدىڭ قۇرىلىسى. بۇگىن «تۇركىستان» الەۋمەتتىك كاسىپكەرلىك كورپوراسياسى مەن جەكە ينۆەستيسيا ەسەبىنەن بوي كوتەرەتىن تۇرعىن ۇيلەردىڭ قۇرىلىس جۇمىستارىنا باستايمىز. مۇندا 2ء-ىنشى جانە 3ء-ىنشى كلاسستاعى 2724 پاتەر بار. وسى باسپانالار «نۇرلى جەر» جانە «7-20-25» باعدارلاماسى اياسىندا جۇزەگە اسادى. بىرەر جىلدا وبلىس ورتالىعى جاڭا كەلبەتكە يە بولادى. قۇرىلىس جۇمىستارىنا وتاندىق ونىمدەر قولدانادى. تۇرعىن ءۇيدىڭ ساپالى بولاتىنىنا سەنىمدىمىن. ىسكە ءسات!"، - دەدى وبلىس اكىمى كوپقاباتتى تۇرعىن ءۇي سالۋدىڭ ىرگەتاسىن قالاۋ ءراسىمىن وتكىزۋ كەزىندە.

اۋماعى 38 گەكتار جەرگە 88 كوپقاباتتى تۇرعىن ءۇي سالىنادى. ونىڭ 44 ءۇيى 2019 جىلى پايدالانۋعا بەرىلسە، قالعان 44 ءۇي 2020 جىلى ەل يگىلىگىنە تاپسىرىلادى.  بارلىعى 4 تۇرعىن ءۇي كەشەنى - «وتىرار»، «سىرداريا»،  «ارمان» جانە «ساۋران». جالپى 2724 پاتەر، 196285 شارشى مەتر الاڭدى الادى. بۇل قۇرىلىستاردى جۇرگىزۋدە «وڭتۇستىك قۇرىلىس سەرۆيس» ج ش س، «بەرەن» ج ش س، «شىمكەنت قۇرىلىس» ج ش س جانە  «NK Building» ج ش س قاتىسادى.

شاھارداعى "وتىرار" شاعىن اۋدانىنان بوي كوتەرەتىن نىساندار «نۇرلى جەر» مەملەكەتتىك تۇرعىن ءۇي باعدارلاماسىن ىسكە اسىرۋ جانە 7-20-25 باعدارلاماسى اياسىندا ينۆەستيسيالاۋ جوباسىمەن «تۇركىستان» الەۋمەتتىك - كاسىپكەرلىك كورپوراسياسى اكسيونەرلىك قوعامى جانە تۇركىستان وبلىسى مەن تۇركىستان قالاسى اكىمدىگىنىڭ بىرلەسكەن جۇمىسىنىڭ ناتيجەسىندە مۇمكىن بولىپ وتىر.

 

تۇركىستان وبلىسى اكىمىنىڭ باسپا ءسوز قىزمەتى