ءقازىر تۇركىستاندا حالىقتى ورتالىقتاندىرىلعان اۋىزسۋمەن قامتاماسىز ەتۋ 94 پايىزدى قۇرايدى. الداعى جىلدارى اۋىزسۋعا دەگەن سۇرانىستىڭ ارتۋىنا بايلانىستى جاڭا سۋقويمالار سالىنۋى قاجەت. كەلەر جىلدىڭ سوڭىنا دەيىن قالانى «كوگىلدىر وتىنمەن» 100 پايىز قامتۋ كوزدەلىپ وتىر. جاڭا ورتالىققا ينفراقۇرىلىم تارتۋدا «جاسىل ەكونوميكا» تۇجىرىمداماسى، ياعني قورشاعان ورتاعا زيانى از، ۇنەمدى ءارى ءتيىمدى تەحنولوگيالار ەنگىزىلەدى.

 

بۇل رەتتە «وڭتۇستىك» ايماقتىق ينۆەستيسيالىق ورتالىقتىڭ باستاماسىمەن شاقىرىلعان دەلەگاسيا قۇرامىندا ينچحون ۇلتتىق ۋنيۆەرسيتەتىنىڭ قۇرمەتتى پروفەسسورى، نوبەل سىيلىعىنىڭ لاۋرەاتى راە كۆون چۋنگ، وڭتۇستىككورەيالىق عالىمدار يۋ دجاە چەون جانە كۆانگ-دون كيم، ەكولوگيالىق ۇيىمدار قاۋىمداستىعى باسقارماسىنىڭ ءتورايىمى ايگۇل ساعاديبەك قىزى، G-Global «جاسىل ەكونوميكا» جانە دامۋ كواليسياسىنىڭ ءتورايىمى سالتانات راحىمبەكوۆا بولدى.

جانسەيىت تۇيمەبايەۆ تۇركىستانعا ينۆەستيسيا تارتۋ دۇرىس ۇيىمداستىرىلسا، بولاشاقتا ورتالىق ازياداعى ينۆەستيسيالىق بۋمنىڭ ەڭ بەلسەندى نۇكتەلەرىنىڭ ءبىرى بولا الاتىنىنا سەنىم ءبىلدىردى. ەكىجاقتى كەزدەسۋدە تۇركىستان ايماعىندا ەكو-قالالاردى قۇرۋ جانە ايماقتى ەنەرگيامەن جابدىقتاۋ، سونداي-اق، SuperGrid ارقىلى ەنەرگيانى ۇزاق قاشىقتىققا ەكسپورتتاۋعا باعىتتالعان «جاسىل ەنەرگەتيكا» سالاسىنداعى جاھاندىق جوبالار تالقىلاندى. جوبالار ايماق باسشىسى تاراپىنان وڭ باعا الدى جانە كەزدەسۋدەن كەيىن وبلىس اكىمى ولاردى دامىتۋ جانە ەنگىزۋ بويىنشا جۇمىس توبىن قۇرۋدى تاپسىردى.

«جاسىل ەكونوميكا» تۇجىرىمداماسى شەڭبەرىندە «وڭتۇستىك» ايماقتىق ينۆەستيسيالىق ورتالىعى تۇركىستان ايماعىندا تۇرمىستىق قاتتى قالدىقتاردى وڭدەۋدىڭ جوباسىن ازىرلەپ، ونى تۇركىستاندا ىسكە اسىرۋدى بۇعان دەيىن ۇسىنعان بولاتىن. ساپار بارىسىندا وڭتۇستىككورەيالىق عالىمدار تۇركىستان قالاسىنداعى قاتتى قالدىقتاردىڭ مورفولوگياسىن زەرتتەپ، ىنتىماقتاستىق تۋرالى ۇسىنىستارعا قىزىعۋشىلىق تانىتتى. نوبەل سىيلىعىنىڭ لاۋرەاتى راە كۆون چۋنگ ەندى تۇركىستان قالاسىندا جۇزەگە اساتىن «جاسىل تەحنولوگيالار» نەگىزىندەگى جوبالارعا ينۆەستيسيا تارتۋ باعىتىندا جۇمىس ىستەمەك.

 

نۇرلان اۋباكىر، جۋرناليست.