تۇركىستان وبلىسىنىڭ اكىمى دارحان ساتىبالدى اپپاراتتىڭ اپتالىق وتىرىسىندا وسى ماسەلەگە ارنايى توقتالىپ، جۇمىستى كۇشەيتۋدى تاپسىردى. «اۋىل اماناتى» جوباسى بويىنشا باياۋ قيمىلداپ، كوش سوڭىندا قالعان اۋدان اكىمدەرىنىڭ، جاۋاپتى باسقارمالاردىڭ جۇمىسىن سىنعا الدى.
– اۋداندار مەن قالالاردى ارالاپ، اكىمدەرمەن، ەلمەن كەزدەسىپ ءجۇرمىز. «اۋىل اماناتى» جوباسىن ۇيلەستىرۋ جۇمىستارى ءالى دە تومەن دەڭگەيدە. جارتىجىلدىق ءبىتىپ جاتىر، باياۋ جۇرۋدە.
وسى جوباعا قاتىستى باسقارمالار، قارجىلىق مەكەمەلەر، «ىرىس» قارجى ۇيىمى، «تۇركىستان» الەۋمەتتىك كاسىپكەرلىك كورپوراسياسى» اق، اكىمدەر، كاسىپكەرلىككە قولداۋ كورسەتۋ ورتالىقتارى جۇمىستى جانداندىرۋى ءتيىس. تۇرعىندارعا قۇجات دايىنداۋعا، جوبالارىن جۇزەگە اسىرۋعا كومەكتەسىڭىزدەر. جوبانىڭ ءساتتى جۇزەگە اسىرىلۋىنا تىكەلەي جاۋاپتىسىزدار. بۇل – مەملەكەت باسشىسىنىڭ نازارىندا تۇرعان اسا ماڭىزدى تاپسىرما. مەملەكەت ۇسىنعان قارجى ءتيىمدى جۇمسالىپ، تۇرعىنداردىڭ ءال-اۋقاتىن ارتتىرۋعا، كاسىپكەرلىكتى جانە اۋىل شارۋاشىلىعىن دامىتۋعا سەرپىن بەرۋى قاجەت، – دەدى دارحان ساتىبالدى.
ماجىلىستە تۇركىستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ن.بەكمۇراتوۆ پەن «تۇركىستان» الەۋمەتتىك كاسىپكەرلىك كورپوراسياسى» اق-نىڭ ءتوراعاسى ف.بايدۋللايەۆتىڭ ەسەپتەرى تىڭدالدى.
جوبانى قارجىلاندىرۋعا رەسپۋبليكالىق بيۋدجەتتەن جىل باسىندا 11 ملرد تەڭگە، ناۋرىز ايىندا رەسپۋبليكالىق بيۋدجەتتى ناقتىلاۋدا قوسىمشا 8،9 ملرد تەڭگە قاراستىرىلىپ، جالپى 19،8 ملرد تەڭگە ءبولىندى.
وبلىس بويىنشا نەگىزگى 6 باعىتتى قارجىلاندىرۋ كوزدەلۋدە. ناتيجەسىندە 3 220 بىرلىك جوباعا قولداۋ كورسەتىلىپ، كەمىندە 3413 بىرلىك جاڭا جۇمىس ورىندارى قۇرىلادى. نەسيە قارجىسىن تاراتۋشى رەتىندە سەنىم بىلدىرگەن وكىل «تۇركىستان اكك» اق-ى بەلگىلەندى. ءوتىنىم قابىلداۋ «تۇركىستان اكك» اق-ى ەنشىلەس مەكەمەسى «ىرىس»شنۇ» ج ش س ارقىلى جۇرگىزىلۋدە.
جوبانى ىسكە اسىرۋدا وڭىردە جەكە قوسالقى شارۋاشىلىقتاردى كووپەراتيۆتەر نەگىزىندە دامىتۋعا باسىمدىلىق بەرىلەدى. پيلوتتىق جوبانى جۇزەگە اسىرۋعا بارلىق اۋىلدىق وكرۋگتەردە سكرينينگ جۇمىستارى جۇرگىزىلىپ، ءبىرىنشى كەزەكتە (11 ملرد تەڭگەگە) جوباعا قاتىساتىن 16 اۋداننان 32 اۋىلدىق وكرۋگى انىقتالدى. 44 كووپەراتيۆ انىقتالىپ، الەۋەتتى نەسيە الۋشىلاردىڭ ءتىزىمى جاساقتالدى. كووپەراتيۆتەردەگى مۇشەلەر سانى – 3406 ادام. بۇگىنگى كۇنى 425 جوبا قابىلدانىپ، 1،1 ملرد تەڭگەگە 236 جوبا ماقۇلدانىپ، قارجىلاندىرۋ جۇمىستارى جۇرگىزىلۋدە.
تالداۋعا سايكەس 90%-ى وتىنىمدەر مال شارۋاشىلىعى سالاسىن دامىتۋ باعىتتىندا وتكىزىلگەن نەمەسە 425 جوبادان 380 جوبا مال شارۋاشىلىعى، 40 جوبا ەگىن شارۋاشىلىعى، 5 جوبا بالىق شارۋاشىلىعىن دامىتۋعا باعىتتالىپ وتىر.
جيىندا قۇس شارۋاشىلىعىن دامىتۋ، بالىق شارۋاشىلىعىن دامىتۋ جانە جوبالاردى ءارتاراپتاندىرۋ بويىنشا تاپسىرمالار بەرىلدى. سونىمەن بىرگە وسى قولداۋ ارقىلى ااك الۋشىلار سانىن ازايتىپ، كاسىپكەرلەر سانىن كوبەيتۋ مىندەتى دە كۇن تارتىبىندە ەكەنى مالىمدەلدى.
