Túrkistan. «Aýyl amanaty» jobasyna túsken ótinimderdiń 90%-y mal sharýashylyǵy damytýdy kózdeidi
Túrkistan oblysynyń ákimi Darhan Satybaldy apparattyń aptalyq otyrysynda osy máselege arnaiy toqtalyp, jumysty kúsheitýdi tapsyrdy. «Aýyl amanaty» jobasy boiynsha baiaý qimyldap, kósh sońynda qalǵan aýdan ákimderiniń, jaýapty basqarmalardyń jumysyn synǵa aldy.
– Aýdandar men qalalardy aralap, ákimdermen, elmen kezdesip júrmiz. «Aýyl amanaty» jobasyn úilestirý jumystary áli de tómen deńgeide. Jartyjyldyq bitip jatyr, baiaý júrýde.
Osy jobaǵa qatysty basqarmalar, qarjylyq mekemeler, «Yrys» qarjy uiymy, «Túrkistan» áleýmettik kásipkerlik korporatsiiasy» AQ, ákimder, kásipkerlikke qoldaý kórsetý ortalyqtary jumysty jandandyrýy tiis. Turǵyndarǵa qujat daiyndaýǵa, jobalaryn júzege asyrýǵa kómektesińizder. Jobanyń sátti júzege asyrylýyna tikelei jaýaptysyzdar. Bul – Memleket basshysynyń nazarynda turǵan asa mańyzdy tapsyrma. Memleket usynǵan qarjy tiimdi jumsalyp, turǵyndardyń ál-aýqatyn arttyrýǵa, kásipkerlikti jáne aýyl sharýashylyǵyn damytýǵa serpin berýi qajet, – dedi Darhan Satybaldy.
Májiliste Túrkistan oblystyq aýyl sharýashylyǵy basqarmasy basshysynyń orynbasary N.Bekmuratov pen «Túrkistan» áleýmettik kásipkerlik korporatsiiasy» AQ-nyń tóraǵasy F.Baidýllaevtyń esepteri tyńdaldy.
Jobany qarjylandyrýǵa respýblikalyq biýdjetten jyl basynda 11 mlrd teńge, naýryz aiynda respýblikalyq biýdjetti naqtylaýda qosymsha 8,9 mlrd teńge qarastyrylyp, jalpy 19,8 mlrd teńge bólindi.
Oblys boiynsha negizgi 6 baǵytty qarjylandyrý kózdelýde. Nátijesinde 3 220 birlik jobaǵa qoldaý kórsetilip, keminde 3413 birlik jańa jumys oryndary qurylady. Nesie qarjysyn taratýshy retinde senim bildirgen ókil «Túrkistan ÁKK» AQ-y belgilendi. Ótinim qabyldaý «Túrkistan ÁKK» AQ-y enshiles mekemesi «Yrys»ShNU» JShS arqyly júrgizilýde.
Jobany iske asyrýda óńirde jeke qosalqy sharýashylyqtardy kooperativter negizinde damytýǵa basymdylyq beriledi. Pilottyq jobany júzege asyrýǵa barlyq aýyldyq okrýgterde skrining jumystary júrgizilip, birinshi kezekte (11 mlrd teńgege) jobaǵa qatysatyn 16 aýdannan 32 aýyldyq okrýgi anyqtaldy. 44 kooperativ anyqtalyp, áleýetti nesie alýshylardyń tizimi jasaqtaldy. Kooperativterdegi músheler sany – 3406 adam. Búgingi kúni 425 joba qabyldanyp, 1,1 mlrd teńgege 236 joba maquldanyp, qarjylandyrý jumystary júrgizilýde.
Taldaýǵa sáikes 90%-y ótinimder mal sharýashylyǵy salasyn damytý baǵyttynda ótkizilgen nemese 425 jobadan 380 joba mal sharýashylyǵy, 40 joba egin sharýashylyǵy, 5 joba balyq sharýashylyǵyn damytýǵa baǵyttalyp otyr.
Jiynda qus sharýashylyǵyn damytý, balyq sharýashylyǵyn damytý jáne jobalardy ártaraptandyrý boiynsha tapsyrmalar berildi. Sonymen birge osy qoldaý arqyly AÁK alýshylar sanyn azaityp, kásipkerler sanyn kóbeitý mindeti de kún tártibinde ekeni málimdeldi.
