قازاقستان سوڭعى جىلدارى تۋريزم سالاسىن ەكونوميكانىڭ ماڭىزدى درايۆەرلەرٸنٸڭ بٸرٸنە اينالدىرۋعا ەرەكشە كٶڭٸل بٶلٸپ كەلەدٸ. تابيعاتى كٶركەم ٶڭٸرلەر, باي تاريحي-مەدەني مۇرا, ۇلتتىق دەستٷرلەر مەن بٸرەگەي گاسترونومييا ەلٸمٸزدٸڭ تۋريستٸك ەلەۋەتٸن ارتتىراتىن نەگٸزگٸ فاكتورلار سانالادى. دەگەنمەن سالانىڭ بەسەكەگە قابٸلەتتٸلٸگٸن كٷشەيتۋ ٷشٸن جاڭا باستامالار مەن جٷيەلٸ جۇمىستار قاجەت.
قازاقستان تۋريستٸك قاۋىمداستىعىنىڭ ديرەكتورى راشيدا شايكەنوۆانىڭ ايتۋىنشا, الداعى بەس جىلدا تۋريستٸك تارتىمدىلىقتى ارتتىرۋدا وقيعالىق تۋريزمگە ەرەكشە نازار اۋدارىلۋى تيٸس, دەپ حابارلايدى dalanews.kz.
– سوڭعى ەكٸ-ٷش جىلدىڭ تەجٸريبەسٸ وقيعالىق تۋريزمنٸڭ قازاقستاننىڭ تۋريستٸك تارتىمدىلىعىن ارتتىرۋداعى نەگٸزگٸ باعىتتاردىڭ بٸرٸ ەكەنٸن كٶرسەتتٸ. سوندىقتان حالىقارالىق جەنە رەسپۋبليكالىق دەڭگەيدەگٸ مەدەني, سپورتتىق جەنە ٸسكەرلٸك ٸس-شارالاردى كٶبەيتۋ ماڭىزدى. مۇنداي جوبالار شەتەلدٸك قوناقتاردىڭ قىزىعۋشىلىعىن ارتتىرىپ قانا قويماي, ٶڭٸرلەردٸڭ تانىمال بولۋىنا دا ىقپال ەتەدٸ, – دەيدٸ مامان.
ساراپشىنىڭ پٸكٸرٸنشە, تۋريزمنٸڭ تابىستى دامۋى ەڭ الدىمەن كٶلٸك قولجەتٸمدٸلٸگٸ مەن سەرۆيستٸڭ ساپاسىنا بايلانىستى. وسىعان بايلانىستى جول-كٶلٸك ينفراقۇرىلىمىن جەتٸلدٸرۋ, ەۋە باعىتتارىنىڭ سانىن كٶبەيتۋ جەنە تۋريستەردٸ ورنالاستىرۋ ورىندارىنىڭ جەلٸسٸن كەڭەيتۋ ماڭىزدى مٸندەتتەردٸڭ قاتارىندا.
بٷگٸندە ساياحاتشىلار ٷشٸن دەمالىس ورنىنىڭ تارتىمدىلىعى تەك تابيعاتىمەن عانا ەمەس, كٶرسەتٸلەتٸن قىزمەت ساپاسىمەن دە ٶلشەنەدٸ. سوندىقتان قوناقٷيلەردٸڭ, دەمالىس ورىندارىنىڭ جەنە تۋريستٸك نىسانداردىڭ قىزمەت كٶرسەتۋ دەڭگەيٸن ارتتىرۋ سالانىڭ بەسەكەگە قابٸلەتتٸلٸگٸن كٷشەيتەدٸ.
تۋريزم يندۋستريياسىنداعى تاعى بٸر ماڭىزدى باعىت – تسيفرلاندىرۋ. زاماناۋي تەحنولوگييالار تۋريستٸك ٶنٸمدەردٸ حالىقارالىق نارىقتا تيٸمدٸ ٸلگەرٸلەتۋگە مٷمكٸندٸك بەرەدٸ. ونلاين برونداۋ جٷيەلەرٸ, تسيفرلىق گيدتەر, موبيلدٸ قوسىمشالار مەن جاساندى ينتەللەكت نەگٸزٸندەگٸ سەرۆيستەر تۋريستەردٸڭ ساپارىن اناعۇرلىم ىڭعايلى ەتەدٸ.
– تۋريزمدٸ تسيفرلاندىرۋ جاڭا نارىقتارعا شىعۋعا جەنە شەتەلدٸك تۋريستەردٸ تارتۋعا جول اشادى. بٷگٸندە ەلەمدٸك تۋريزم يندۋستريياسى تسيفرلىق شەشٸمدەرگە سٷيەنەدٸ. سوندىقتان بۇل باعىتتاعى جۇمىستاردى كٷشەيتۋ قاجەت, – دەيدٸ راشيدا شايكەنوۆا.
ساراپشى ۇلتتىق اسحانا مەن گاسترونومييالىق تۋريزمدٸ دامىتۋدىڭ دا ماڭىزدىلىعىنا توقتالدى. ونىڭ ايتۋىنشا, تۋريستەردٸ تابيعات پەن كٶرٸكتٸ جەرلەر عانا ەمەس, جەرگٸلٸكتٸ حالىقتىڭ مەدەنيەتٸ مەن تۇرمىس-تٸرشٸلٸگٸ دە قىزىقتىرادى.
قازاقتىڭ دەستٷرلٸ تاعامدارى, ٶڭٸرلٸك اس مەزٸرٸ جەنە ۇلتتىق قوناقجايلىق مەدەنيەتٸ ەلٸمٸزدٸڭ تۋريستٸك برەندٸنە اينالۋى مٷمكٸن. بۇل باعىتتا گاسترونومييالىق فەستيۆالدەر ۇيىمداستىرىپ, ۇلتتىق تاعامداردى حالىقارالىق دەڭگەيدە ناسيحاتتاۋ ماڭىزدى.
جالپى, ساراپشىنىڭ پٸكٸرٸنشە, تۋريزم سالاسىنىڭ نەگٸزگٸ قاعيداتى تۇراقتى دامۋ بولۋى تيٸس. بۇل رەتتە شەتەلدٸك تۋريستەردٸ تارتۋمەن قاتار, ٸشكٸ تۋريزمدٸ دامىتۋ دا باسىمدىقتاردىڭ بٸرٸ بولىپ قالا بەرەدٸ.
– ەڭ باستىسى – قازاقستاندىقتار ٶز ەلٸندە ساپالى تۋريستٸك قىزمەت الىپ, تٶلەگەن قاراجاتىنا ساي سەرۆيستٸ كٶرەتٸنٸنە سەنٸمدٸ بولۋى كەرەك. سوندا عانا ٸشكٸ تۋريزم دە, حالىقارالىق تۋريزم دە قارقىندى داميدى, – دەيدٸ قازاقستان تۋريستٸك قاۋىمداستىعىنىڭ ديرەكتورى.
مامانداردىڭ ايتۋىنشا, وقيعالىق تۋريزمدٸ دامىتۋ, ينفراقۇرىلىمدى جەتٸلدٸرۋ, تسيفرلىق تەحنولوگييالاردى ەنگٸزۋ جەنە ۇلتتىق ەرەكشەلٸكتەردٸ تيٸمدٸ ناسيحاتتاۋ قازاقستاننىڭ تۋريستٸك ەلەۋەتٸن جاڭا دەڭگەيگە كٶتەرۋگە مٷمكٸندٸك بەرەدٸ. ال بۇل ٶز كەزەگٸندە ٶڭٸرلەردٸڭ ەكونوميكالىق دامۋىنا سەرپٸن بەرٸپ, ەلٸمٸزدٸڭ حالىقارالىق تۋريستٸك كارتاداعى ورنىن نىعايتا تٷسپەك.
