ۆەدومستۆو باسشىلىعى ەلىمىزدەگى مەرەكەلىك كۇندەردىڭ تىزىمىنە تاعى بار كاسىبي ماماندىق ەنگىزۋدى جوسپارلاپ وتىر. بۇدان بىلاي 16 ءساۋىر «تۇرعىن ءۇي – كوممۋنالدىق شارۋاشىلىعى سالاسى جۇمىسشىلارىنىڭ» مەرەكەسى رەتىندە اتاپ وتىلەدى.
مۇنداي ۇسىنىس اشىق ۇكىمەت پورتالىنا جولداعان مينيسترلىك ماماندارىنىڭ ايتۋىنشا، اتالعان سالا ماماندارىنىڭ ەڭبەگى كوپ جاعدايدا ەلەۋسىز قالادى.
«تۇرعىن ءۇي – كوممۋنالدىق شارۋاشىلىق سالاسىنىڭ ماماندارى ەلىمىزدى تاۋلىك بويى جىلۋمەن، جارىقپەن، سۋمەن قامتاماسىز ەتىپ وتىر. ەسىك الدىن، اۋلانى تازارتىپ، قالا كوشەلەرىن، ساياباقتاردى تازارتىپ تۇرعىنداردىڭ جايلى ءارى قولايلى دەمالىسىنا جاعداي جاساپ كەلەدى. ولاردىڭ ەڭبەگى لايىقتى باعالانۋى ءتيىستى دەپ سانايمىز»، – دەلىنگەن اشىق ۇكىمەت پورتالىنا ورنالاستىرىلعان قۇجاتتا.
ايتا كەتەلىك، تۇرعىن ۇي-كوممۋنالدىق شارۋاشىلىق جۇمىسشىلارىنىڭ مەرەكەسى كسرو كەزىندە اتاپ وتىلەتىن. مەرەكە تمد -نىڭ ءبىرقاتار ەلدەرىندە الىگە دەيىن ساقتالىپ قالعان.
يندۋستريا جانە ينفراقۇرىلىمدىق دامۋ مينيسترلىگى ءوز كەزەگىندە وسى مەرەكەنى اتاپ ءوتۋ ارقىلى سالاعا جاستاردى كوپتەپ تارتۋدى كوزدەپ وتىر.
مينيسترلىك دەرەگىنشە، بۇگىندەرى بۇل سالاعا جاس ماماندار مەن جوعارى بىلىكتى ينجەنەرلەر اۋاداي قاجەت. وسى سالادا 20-30 جىل بويى تالماي، تىنباي ەڭبەك ەتكەن اعا بۋىننىڭ ورنىن باساتىن جاس كادرلار كەرەك.
وكىنىشكە قاراي، جاستار اتالعان سالانىڭ ايلىعى از، ءيميدجى تومەن دەپ ەسەپتەيدى، سونىڭ سالدارىنان كوبىنە-كوپ باسقا ماماندىقتاردى تاڭداپ جاتادى.
ەسكە سالايىق، ۇلتتىق قۇرىلتايدىڭ العاشقى وتىرىسىندا پرەزيدەنت توقايەۆ ۇلتتىق مەرەكەلەر مەن مەرەيتويلارعا وزگەرىس ەنگىزۋ قاجەتتىگىن مالىمدەگەن ەدى.
