Vedomstvo basshylyǵy elimizdegi merekelik kúnderdiń tizimine taǵy bar kásibı mamandyq engizýdi josparlap otyr. Budan bylaı 16 sáýir «Turǵyn úı – komýnaldyq sharýashylyǵy salasy jumysshylarynyń» merekesi retinde atap ótiledi.
Mundaı usynys Ashyq úkimet portalyna joldaǵan mınıstrlik mamandarynyń aıtýynsha, atalǵan sala mamandarynyń eńbegi kóp jaǵdaıda eleýsiz qalady.
«Turǵyn úı – komýnaldyq sharýashylyq salasynyń mamandary elimizdi táýlik boıy jylýmen, jaryqpen, sýmen qamtamasyz etip otyr. Esik aldyn, aýlany tazartyp, qala kóshelerin, saıabaqtardy tazartyp turǵyndardyń jaıly ári qolaıly demalysyna jaǵdaı jasap keledi. Olardyń eńbegi laıyqty baǵalanýy tıisti dep sanaımyz», – delingen Ashyq úkimet portalyna ornalastyrylǵan qujatta.
Aıta ketelik, turǵyn úı-kommýnaldyq sharýashylyq jumysshylarynyń merekesi KSRO kezinde atap ótiletin. Mereke TMD -nyń birqatar elderinde álige deıin saqtalyp qalǵan.
Indýstrıa jáne ınfraqurylymdyq damý mınıstrligi óz kezeginde osy merekeni atap ótý arqyly salaǵa jastardy kóptep tartýdy kózdep otyr.
Mınıstrlik dereginshe, búginderi bul salaǵa jas mamandar men joǵary bilikti ınjenerler aýadaı qajet. Osy salada 20-30 jyl boıy talmaı, tynbaı eńbek etken aǵa býynnyń ornyn basatyn jas kadrlar kerek.
Ókinishke qaraı, jastar atalǵan salanyń aılyǵy az, ımıji tómen dep esepteıdi, sonyń saldarynan kóbine-kóp basqa mamandyqtardy tańdap jatady.
Eske salaıyq, Ulttyq quryltaıdyń alǵashqy otyrysynda prezıdent Toqaev ulttyq merekeler men mereıtoılarǵa ózgeris engizý qajettigin málimdegen edi.
