تەلەگرام-ارنالاردىڭ بىرىندە قاڭتاردا سامات ءابىشتىڭ بۇيرىعىن ورىندادىم دەگەن پولكوۆنيك رۋسلان ىسقاقوۆتىڭ حاتىنا جاۋاپ پايدا بولدى، - دەپ حابارلايدى Dalanews.kz.
مۇندا رۋسلان ىسقاقوۆ حاتتى وزىنەن جاۋاپكەرشىلىكتى الىپ تاستاۋ ءۇشىن جازعانى ايتىلادى.
"ىسقاقوۆ ءوزىن جاقسى جاعىنان كورسەتۋ ءۇشىن كەيبىر دەرەكتەر تۋرالى اۋىز اشپاي، كەيبىرىن ادەيى بۇرمالاپ وتىر. مىسالى، ونىڭ مەملەكەت باسشىسىنىڭ الداعى نارازىلىق اكسيالارى تۋرالى ەسكەرتۋلەرى تۋرالى تاراتقان اقپاراتى شىندىققا سايكەس كەلمەيدى. قاڭتار وقيعاسى باستالعان تۇستا سودىرلاردىڭ ستراتەگيالىق ارسەنالعا كەدەرگىسىز قول جەتكىزۋىن قامتاماسىز ەتۋ ءۇشىن الماتىداعى ىشكى ىستەر دەپارتامەنتىنىڭ عيماراتى تولىعىمەن قاراۋسىز قالدى. ىسقاقوۆ بۇل تۋرالى ايتپايدى"، - دەلىنگەن جازبادا.
رۋسلان ىسقاقوۆ "ديكيي ارماندى" ءتارتىپتى قاداعالاپ جۇرگەن ادام سياقتى كورسەتكەن كورىنەدى.
"ول قولاستىنداعى ادامدى ("ديكيي ارماندى") قىلمىس الەمىنە قاتىسى بار دەپ ەمەس، الەۋمەتتىك نىسانداردى قورعاپ جۇرگەن ءوزىنىڭ "دوسى" سەكىلدى اتاپ وتەدى. ونى دالەلدەيتىن ايعاق تا بار: ولار اسكەريلەر مەن پوليسيا جارالانعان سودىرلاردى جانە ولاردىڭ دەنەسىن الىپ كەتۋىنە جول بەرمەگەن، ول ءۇشىن ولار اۋرۋحانالاردى قورشاپ العان. حاتتا "قازاقستان" قوناقۇيىندە ادامداردى كەپىلگە الىپ، ازاپتاۋ ءۇشىن قۇرىلعان شتاب تۋرالى دا ايتىلماعان. ودان بولەك، "ديكيي ارمان" ۇستالعان كەزدە ودان قارۋلار تاركىلەنگەن. كۇنى كەشە ديكيي ارماننىڭ قولاستىنداعى ادامدار ۇستالدى.
سامات ءابىش تۋرالى ايتقانى دا ەرەكشە كوزگە ءتۇستى. بۇگىندە نازاربايەۆتىڭ نەمەرە ىنىسىنە قاتىستى قىلمىستىق ءىس قوزعالدى جانە ىسقاقوۆ راسىندا ونىڭ بۇيرىعىن ورىنداعان. ول ۇيىمداسقان قىلمىستىق توپ مۇشەلەرىنىڭ ارەكەتىن ۇيىمداستىرىپ، ولارعا بۇيرىق بەرگەن. ول ۆيدەو ارقىلى دالەلدەنگەن".
سونىمەن قاتار، ارناداعى جازبادا بۇرىنعى ىشكى ىستەر ءمينيسترى ەرلان تۇرعىمبايەۆقا قاتىستى مالىمەت بەرىلگەن.
"تاعى ءبىر ماڭىزدى فاكت: تۇرعىمبايەۆ "ديكيي ارماننىڭ" قاڭتاردا قازاقستانعا ەمىن-ەركىن كىرۋىنە جاردەمدەسكەن جانە مەملەكەت باسشىسىنا سول تۇستاعى احۋال تۋرالى تەرىس اقپارات بەرگەن. نەگە ەكەنى، ىسقاقوۆ الماتىدا قارۋ-جاراق ارسەنالى ساقتالعان جانە تارتىپسىزدىككە قارسى شتاب بولعان ءىىد عيماراتى باسىپ الىنعانى تۋرالى ءسوز قوزعامايدى. ىسقاقوۆ بۇل تۋرالى ايتپاۋدى ءجون كورەدى. ءبىراق تايمەردەنوۆ اۋەجايدى باسىپ الۋعا قاتىسقان كەيبىر ادامداردى بوساتىپ جىبەرگەنىن باسىپ ايتادى.
اۋەجايدى باسىپ الۋعا قاتىستى دا بولەك توقتالۋعا بولادى. ىسقاقوۆ اۋەجاي باسىپ الىنعاننان كەيىن كەلگەن جۇمباق بورت تۋرالى، ول بورت ارتىنشا بىشكەككە بوس بولىپ ۇشىپ كەتكەنى تۋرالى ايتپايدى. سونىمەن قاتار، ول بورت الماتىعا 10 رەت ۇشىپ كەلگەنىن، ارتىنان مۇلدە كورىنبەگەنى تۋرالى ايتپاعان. شەكارا ۇقك باقىلاۋىندا ەكەنىن ەسكەرسەك، قازاقستانعا قاڭتار وقيعاسىن باقىلاۋعا العان راديكالدار ۇشىپ كەلۋى دە عاجاپ ەمەس".
ماتەريالدىڭ رەسەيلىك "نوۆايا گازەتا" باسىلىمىندا جارىق كورۋى دە بەكەر ەمەس بولۋى مۇمكىن.
"بۇل ماتەريالدىڭ ارتىندا ماسكەۋدەن ءبىر ادام تۇرۋى مۇمكىن. ءبىراق بۇل باسىلىم نەسىمەن ىڭعايلى؟ سەبەبى ولار كونتەكستتى تۇسىنبەيدى، ونىڭ جۋرناليستەرى قاڭتار وقيعاسى تۋرالى ەشتەڭە بىلمەيدى جانە ءاربىر جەكە ۇستانىمعا قاتىستى سىني تۇرعىدا سۇراقتار قويا المايدى"، - دەلىنگەن جازبادا.
ايتا كەتەيىك، كەشە قاڭتار وقيعاسىنان كەيىن جاپپاي تارتىپسىزدىكتەردى ۇيىمداستىردى دەپ ايىپتالعان پولكوۆنيك رۋسلان ىسقاقوۆ "نوۆايا گازەتاعا" شىن مانىندە نە بولعانىن ايتقانى بەلگىلى بولعان ەدى. ول "ديكيي ارمان" شىن مانىندە سامات ءابىشتىڭ بۇيرىعىن ورىنداعانىنا سەنىمدى.
رۋسلان ىسقاقوۆ حاتتا سامات ءابىشتىڭ قانداي بۇيرىعىن ورىنداعانىن اشىق ايتىپ بەرگەن بولاتىن.
