تٷركٸستان وبلىسى, تٷلكٸباس اۋدانى, شۇبايقىزىل شوقىسى ەلٸمٸزدٸڭ «قىزىل كٸتابىنا» ەنگٸزٸلگەن گرەيگ قىزعالداعى ەڭ كٶپ ٶسەتٸن اۋماق. بۇل قىزعالداقتار قازىعۇرت, تٶلەبي, بەيدٸبەك ٶڭٸرلەرٸندەگٸ تاۋلى اۋماقتاردا كەزدەسەدٸ. جىلىنا بٸر رەت نەبەرٸ 10-15 كٷن عانا گٷلدەيتٸن قىزعالداقتار تٸرشٸلٸك جاڭارعان شاقتا 15-20 گەكتارداي جەردٸ الىپ جاتقان القاپ قىزىل كٸلەمگە ورانعانداي ەسەم تٷرگە ەنەدٸ.
2018 جىلدان باستاپ تابيعاتىمىزدىڭ كٶركەم سىيلارىنىڭ بٸرٸ قىزعالداقتى دەرٸپتەپ, كەيٸنگٸ ۇرپاققا بار ماڭىزدىلىعىن جەتكٸزۋ ماقساتىندا «اقسۋ-جاباعىلى الاۋى, شۇبايقىزىل-جالاۋى!» اتتى قىزعالداقتار فەستيۆالٸن ٶتكٸزۋ تٷركٸستان ٶڭٸرٸندە دەستٷرگە اينالعان.
ايتۋلى شارادا العاش بولىپ سٶز العان تٷركٸستان وبلىسى ەكٸمٸنٸڭ ورىنباسارى مەلٸك وتارباەۆ جيىلعان جۇرتتى بيىلعى قىزعالداق فەستيۆالٸنٸڭ اشىلۋىمەن قۇتتىقتادى.
– ەلباسىمىز نۇرسۇلتان نازارباەۆ «ۇلى دالانىڭ جەتٸ قىرى» اتتى باعدارلامالىق ماقالاسىندا قازاقستان الما مەن قىزعالداقتىڭ وتانى ەكەنٸن ايتتى. تٸپتٸ, قىزعالداق قازاق دالاسىنان ەۋروپا ەلدەرٸنە ۇلى جٸبەك جولى ارقىلى جەتتٸ دەگەن دەرەك بار. بۇل – بٸز ٷشٸن ماقتانىش ەرٸ ٷلكەن جاۋاپكەرشٸلٸك. بٷگٸنگٸ ٸس-شارانىڭ ماقساتى– قورشاعان ورتانى, سونىڭ ٸشٸندە قىزعالداقتى قورعاۋعا شاقىرۋ, «رۋحاني جاڭعىرۋ» باعدارلاماسى اياسىنداعى تۋعان جەردٸ تٷلەتۋ, تۋريزم مەن تاريحي ورىنداردى ناسيحاتتاۋ باعىتىنداعى مٸندەتتەردٸ ورىنداۋ. ەندەشە سۇلۋلىقتىڭ سيمۆولىنداي قىزعالداقتارىمىز مەڭگٸ قۇلپىرىپ, تٷركٸستان وبلىسى گٷلدەنە بەرسٸن! – دەدٸ مەلٸك نۇرجانۇلى.
ال تانىمال جازۋشى «الاش» سىيلىعىنىڭ يەگەرٸ مارحابات بايعۇت شۇبايقىزىل شوقىسىن ساقتاپ, ونى ەرەكشە قورعاۋعا الۋ كەرەكتٸگٸن ايتتى. جۇرتشىلىققا گٷلدٸ جۇلماۋ كەرەكتٸگٸن ەسكەرتتٸ.
دەستٷرلٸ شارا بارىسىندا «شۇبايقىزىل – قىزعالداقتىڭ وتانى» تەاترلاندىرىلعان قويىلىمى مەن «شۇبايقىزىل قىزعالداعىم» سازدى-حورەوگرافييالىق كٶرٸنٸستەرٸ قويىلدى.
فەستيۆال اياسىندا «شۇرايلىم, شۇبايقىزىلىم» اتتى جاس قالامگەرلەر مەن كومپوزيتورلاردىڭ بايقاۋى جاڭا فورماتتا ٶتكٸزٸلدٸ. شارا بارىسىندا اتالمىش بايقاۋلاردىڭ جەڭٸمپازدارىن ماراپاتتاۋ رەسٸمٸ ٶتتٸ.
سونداي-اق, فەستيۆالدە «ۇلى دالا ۇرانى – قىزعالداق فەستيۆالٸ» تابيعاتتى قورعاۋشىلار شەرۋٸ ٶتٸپ, «تابيعات ساقشىلارى» اتتى وبلىس ايماعىنداعى مەملەكەتتٸك قورىقتاردىڭ كٶرمەسٸ ۇيىمداستىرىلدى. سونىمەن قاتار, جينالعان جۇرت «قىزعالداق سارايى» وبلىستىق سۋرەتشٸلەر كٶرمەسٸن تاماشالاپ, شارا «شۇبايقىزىل» شوقىسىنا جالپىحالىقتىق ساياحاتقا ۇلاستى.
تٷركٸستان وبلىسى ەكٸمٸنٸڭ باسپاسٶز قىزمەتٸ
