بۇگىندە اۋدانداعى الما باۋلارىنا الما كوشەتتەرى يتاليا مەن تۇركيادان جانە پولشادان اكەلىنۋدە. ءقازىر گالا، گولدەن، پيرومين جانە كامسپور دەگەن جاڭا سورتتار تۇلكىباس دالاسىن تۇرلەندىرىپ تۇر.
وتكەن جىلى تۇلكىباس اۋدانىنىڭ باعباندارى 25 مىڭ توننا ءونىم جيناسا، بيىل بۇل كورسەتكىش 30 مىڭعا جەتەدى دەپ كۇتىلۋدە. جالپى، وندىرىلگەن ءونىمدى ساقتاۋدا اۋداندا 3،5 مىڭ توننالىق قويما بار. قىركۇيەك ايىنىڭ سوڭىندا 2 مىڭ توننالىق تاعى ءبىر قويما ىسكە قوسىلىپ، شارۋالاردىڭ الما ساقتاۋ مۇمكىندىگىن كەڭەيتتى. وسىلايشا بيىل تۇلكىباس اۋدانى ءبىر جىلدا 5،5 مىڭ توننا الما ساقتاۋ مۇمكىندىگىنە يە بولىپ وتىر.
ەندىگى ماقسات – 2020 جىلعا دەيىن ءۇش مىڭ گەكتارعا جاڭا باۋ ەگىپ، ءونىم كولەمىن 45-50 مىڭ تونناعا دەيىن جەتكىزۋ جوسپارلانۋدا. اۋىل شارۋاشىلىعى سالاسىنىڭ دامۋ قارقىنىنا بايلانىستى مىناداي دەرەك كەلتىرسەك. 1991-2017 جىلدار ارالىعىندا بارلىعى 1619،5 گەكتار جەرگە الما باۋ مەن جۇزىمدىكتەر ەگىلدى، 13،5 گەكتار جەرگە جىلىجاي سالىنعان.
2009 جىلدان باستاپ تامشىلاتىپ سۋعارۋ تەحنولوگياسى قولعا الىنىپ، بيىلدىڭ وزىندە وسى ءادىس 4474 گەكتار جەرگە جاڭا تەحنولوگيا قولدانىلىپ كەلەدى. بۇگىندە زاماناۋي اگروتەحنولوگيالاردى قولدانۋ – باسەكەگە قابىلەتتىلىكتى ارتتىرا تۇسەتىنى انىق. سوندىقتان، شارۋالار وسى باعىتتاعى جۇمىستى كۇشەيتۋگە باسىمدىق بەرىپ كەلەدى.
Dalanews.kz
