ءماجىلىس دەپۋتاتى ەرلان سايىروۆ الەۋمەتتىك جەلىدە تاراعان داۋلى سۋرەتكە قاتىستى پىكىر ءبىلدىردى. كادردا تۋ ۇستاپ، تۇمشالانىپ سۋرەتكە تۇسكەندەر كورىنەدى، – دەپ حابارلايدى Dalanews.kz.
سايىروۆ تۋدى بۇلاي قورلاۋعا جول بەرىلمەيتىنىن مالىمدەدى.
"قازاقستان رەسپۋبليكاسىنىڭ جالاۋى - ەلىمىزدىڭ تاۋەلسىزدىگىنىڭ، مەملەكەتتىڭ بۇلجىماستىعىنىڭ، وتانىمىزدىڭ زايىرلىعىنىڭ باستى سيمۆولى! قازاقستاننىڭ تۋىن مىنا ءتارىزدى "تالاعىن" شىعارۋعا ەشكىمگە جول جوق!
مىنا ءبىزدىڭ قاسيەتتى تۋىمىزدى قورلاۋ فاكتىسى بويىنشا قۇقىق قورعاۋ ورگاندارى قاتاڭ تەكسەرۋ جۇرگىزىپ، زاڭ بويىنشا قاتاڭ شارالار قولدانۋى ءتيىس!" - دەدى دەپۋتات.
سۋرەتتەگىلەر ساۋد ارابياسى تۋىنىڭ ەلەمەنتتەرى بار قازاقستان تۋىن ۇستاپ تۇرعانى كورىنەدى. ال سۋرەت اتىراۋ قالاسىنداعى حيۋاز دوسپانوۆا اتىنداعى مۇز سارايىندا تۇسىرىلگەن بولۋى مۇمكىن.
قۇقىق قورعاۋ ورگاندارى بولعان وقيعانىڭ ءمان-جايىن انىقتاپ جاتىر. تەرگەۋ بارىسىندا ۇستالعاندارعا كوپتەگەن سۇراق قويىلۋى مۇمكىن: بۇل تۋدى قايدان الدى، ونى قانداي ماقساتتا پايدالاندى جانە نەگە الەۋمەتتىك جەلىلەردە جاريالادى، ت.س.س.؟
قانداي جازا ءتونىپ تۇر؟
قازاقستان زاڭناماسىنا سايكەس مەملەكەتتىك رامىزدەردى قورلاۋ قىلمىستىق جاۋاپكەرشىلىككە اكەپ سوعادى.
قىلمىستىق كودەكستىڭ 372-بابى بويىنشا مۇنداي ارەكەت ءۇشىن ءۇش مىڭ ايلىق ەسەپتىك كورسەتكىشكە دەيىن ايىپپۇل سالۋ، سول سوماعا تۇزەۋ جۇمىستارى، 900 ساعاتقا دەيىن قوعامدىق جۇمىستار، ەكى جىلعا دەيىن باس بوستاندىعىن شەكتەۋ نەمەسە سول مەرزىمگە باس بوستاندىعىنان ايىرۋ جازاسى كوزدەلگەن.
