كۇنى كەشە اقش-تىڭ پەنسيلۆانيا شتاتىندا سايلاۋالدى تالقىلاۋلار كەزىندە ءسوز سويلەپ جاتقان دونالد ترامپقا قاستاندىق جاسالدى. بەلگىسىز بىرەۋ ەكس-پرەزيدەنتكە قاراي وق اتىپ، سالدارىنان ترامپتىڭ قۇلاق تۇسىنا وق تيگەن. كەمىندە ءبىر ادام قازا تاپتى، - دەپ حابارلايدى Dalanews.kz.
وقيعا سايلاۋعا قاتىسىپ جاتقان دونالد ترامپ ەل الدىندا ءسوز سويلەپ جاتقان كەزدە بولعان. ءبىر كەزدە وق اتىلىپ، ەكس-پرەزيدەنت بىردەن تريبۋنانىڭ ارتىنا تىعىلا كەتتى. اتىس اياقتالعان كەزدە ترامپتىڭ كۇزەتشىلەرى ونى قورشاپ، ساحنادان الىپ كەتەدى. ۆيدەولاردا ترامپتىڭ قۇلاعى مەن بەتى قانسىراعانىن كورۋگە بولادى.
ارتىنشا پرەزيدەنتتىككە كانديدات ترامپتى كىم اتقانى بەلگىلى بولدى. ول 20 جاستاعى امەريكالىق - توماس مەتيۋ كرۋكس بولىپ شىققان. كرۋكس رەسپۋبليكالىقتار تىزىمىندە بولعان. ول پەنسيلۆانيا شتاتىنداعى بەتەل-پارك قالاسىندا تۇرعان.
كرۋكس دونالد ترامپ سويلەپ تۇرعان ساحناعا جاقىن شاتىردا تۇرعان. ول ترامپقا قاستاندىق جاساعاننان كەيىن قۇپيا قىزمەت سنايپەرلەرى ونى اتىپ ولتىرگەن. ارتىنشا كرۋكس جاتقان جەردە AR ۆينتوۆكاسى تابىلعان.
توماس مەتيۋ كرۋكس ترامپتى نە ءۇشىن اتىپ ولتىرمەك بولعانى بەلگىسىز. New York Post مالىمەتىنشە، فەدەرالدى تەرگەۋ باسقارماسى (فبر) كرۋكستى ترامپقا جاسالعان قاستاندىققا قاتىسى بار دەپ رەسمي مالىمدەگەن.
SHOT تەلەگرام ارناسىنىڭ مالىمەتىنشە،كەيبىر ادامدار كرۋكستىڭ شاتىردا جۇرگەنىن قاستاندىق جاسالاردان بۇرىن دا بايقاعان. ولار قۇپيا قىزمەت پەن پوليسيا قىزمەتكەرلەرىنە ەسكەرتۋگە تىرىسقانىمەن كۋاگەرلەرگە ەشكىم ءمان بەرمەگەن كورىنەدى.
وق ترامپتىڭ قۇلاعىنا تيگەن. الايدا ءقازىر ەكس-پرەزيدەنتتىڭ جاعدايى ءتاۋىر كورىنەدى. سەبەبى ونىڭ كومەكشىسى الەۋمەتتىك جەلىدە ترامپتىڭ ۇشاق تراپىنان ءتۇسىپ كەلە جاتقان ۆيدەوسىن سالعان.
