اقش پرەزيدەنتى دونالد ترامپ وتكەن جۇما كۇنى اق ۇيدە وتكەن شيەلەنىستى كەزدەسۋدە ۋكراينا پرەزيدەنتى ۆلاديمير زەلەنسكييگە رەسەيدىڭ شارتتارىن قابىلداۋدى تالاپ ەتكەن. بۇل تۋرالى Financial Times دەرەككوزى مالىمدەدى، دەپ حابارلايدى Dalanews.kz.
باسىلىمنىڭ مالىمەتىنشە، ەكى ەل باسشىلارىنىڭ كەزدەسۋى بىرنەشە رەت داۋ-جانجالعا ۇلاسقان. ترامپ ءجيى اشۋلانىپ، قاتتى سويلەگەن. دەرەككوزدەردىڭ ايتۋىنشا، اق ءۇي باسشىسى زەلەنسكييدەن اۋماقتىق جەڭىلدىكتەرگە كەلىسۋدى تاباندى تۇردە سۇراعان.
پرەزيدەنت اقش كارتالاردى ۇستەلدەن ىسىرىپ تاستاپ، ءبىر كۇن بۇرىن رەسەي پرەزيدەنتىمەن تەلەفون ارقىلى سويلەسكەندە ايتىلعان ۋاجدەردى بىرنەشە رەت قايتالاپ وتىرعان.
ماتەريالدا ايتىلعانداي، ترامپ كەزدەسۋدەن كەيىنگى مالىمدەمەسىندە قاقتىعىستى قازىرگى بايلانىس شەبى بويىنشا "توقتاتا تۇرۋ" تۋرالى پىكىر بىلدىرگەنىمەن، ونىڭ زەلەنسكييگە قاتىستى قاتقىل مىنەزى "ءپۋتيننىڭ بارىنشا قاتاڭ تالاپتارىن قولداۋعا ءازىر ەكەنىن" كورسەتكەن.
16 قازاندا ترامپ رەسەي پرەزيدەنتىمەن تەلەفون ارقىلى سويلەسىپ، "ايتارلىقتاي ىلگەرىلەۋ بارىن" مالىمدەگەن بولاتىن. ەكى تاراپ الدىمەن سىرتقى ىستەر مينيسترلەرىنىڭ كەزدەسۋىن، سودان كەيىن ۆەنگريا استاناسىندا مەملەكەت باسشىلارىنىڭ جەكە جۇزدەسۋىن وتكىزۋگە ۋاعدالاسقان.
اقش پەن ۋكراينا باسشىلارىنىڭ كەزدەسۋى 17 قازاندا ءوتتى. باستى تاقىرىپ – كييەۆكە الىس قاشىققا ۇشاتىن Tomahawk قاناتتى زىمىراندارىن بەرۋ ماسەلەسى بولدى.
