اقش پرەزيدەنتى دونالد ترامپ ونىڭ كومانداسى قارجىگەر دجوردج سوروس پەن ونىڭ وتباسىنا قاتىستى اۋقىمدى تەرگەۋ اشۋدى قاراستىرىپ جاتقانىن مالىمدەدى، دەپ حابارلايدى Dalanews.kz.
ترامپتىڭ ايتۋىنشا، ءسوز بۇكىل ەل بويىنشا جاپپاي نارازىلىقتاردى قارجىلاندىرۋ تۋرالى بولىپ وتىر.
"ولار وزدەرىنىڭ "كاسىبى" ءۇشىن سوروستان جانە باسقا ادامداردان اقشا الادى. ءبىز مۇنى وتە مۇقيات زەرتتەپ جاتىرمىز"، – دەدى ترامپ.
بۇعان دەيىن ترامپ سوروسقا قاتىستى بىرنەشە رەت قاتتى پىكىر بىلدىرگەن ەدى.
ول سوروستى جانە ونىڭ ۇلى الەكسانى زورلىق-زومبىلىق سيپاتىنداعى نارازىلىقتاردى قولدادى، حاوس تۋدىردى جانە امەريكالىق بىرەگەيلىكتى جويۋعا تالپىندى دەپ ايىپتادى. ونىڭ پىكىرىنشە، ميللياردەرلەردى RICO زاڭىنا (رەكەت پەن ۇيىمداسقان قىلمىسقا قارسى كۇرەس تۋرالى زاڭ) سايكەس جاۋاپكەرشىلىككە تارتۋ قاجەت.
"دجوردج سوروس پەن ونىڭ راديكالدى سولشىل ۇلى بۇكىل اقش اۋماعىندا زورلىق-زومبىلىقتى نارازىلىقتاردى جانە تاعى باسقا كوپتەگەن نارسەلەردى قولداعانى ءۇشىن RICO زاڭىنا سايكەس ايىپتالۋى ءتيىس.
ءبىز بۇل اقىماق ادامداردىڭ امەريكانى ودان ءارى بولشەكتەۋىنە جول بەرمەيمىز. سوروس پەن ونىڭ پسيحوپاتتار توبى ەلىمىزگە وراسان زور زيان كەلتىردى!"، – دەپ اتاپ ءوتتى دونالد ترامپ.
