بارلىعى كىتاپحانا ۇلگىسىمەن قايتا جابدىقتالدى. اۋداننىڭ كاسىپكەرلەرى ءبىلىم سالاسىنا قايىرىمدىلىق جاساپ، پاندەميا باستالعالى توقتاعان تويحاناداردىڭ جۇمىسىن باسقا سالاعا بۇرۋدا.
سايرام اۋدانىنىڭ اكىمى ۇلاسبەك سادىبەك ۇلىنىڭ باستاماسىمەن قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي، «اۋىل – ەل بەسىگى» جوباسى اياسىندا دەمەۋشىلەر ەسەبىنەن ءۇش جاڭا كىتاپحانا اشىلدى.
ماسەلەن، قاراسۋ اۋىلىندا جەكە كاسىپكەر بايسەيىت جامالبەكوۆ جەكە كەڭسەسىن سىيعا تارتقان. ءسويتىپ، وندا كىتاپحانا اشىلدى. ال، قارابۇلاق اۋىلىندا جەكە كاسىپكەر ر.حالجاليلوۆ سالتانات سارايىنىڭ ءبىرىنشى قاباتىن كىتاپحاناعا اينالدىردى. ءقازىر مۇندا ينتەرنەت جەلىسى تارتىلىپ، كىتاپ قورى جيناقتالۋدا. ءسانى مەن سالتاناتى كەلىسكەن ساراي ەندى تويشىل قاۋىمعا ەمەس، ءبىلىمپاز جاستارعا قىزمەت كورسەتەدى.
بۇدان بولەك، قارامۇرت اۋىلدىق وكرۋگىندەگى اشىلعان كىتاپحانا جەكە كاسىپكەر باحادىر ازيمباي ۇلىنىڭ سىيى. بۇرىن مەيرامحانا بولعان عيماراتتا بۇگىندە وقىرمانعا جاعداي جاسالعان. مادەني وشاقتىڭ تۇساۋكەسەر راسىمىنە اۋدان باسشىلى مەن «Nur Otan» پارتياسى سايرام اۋداندىق فيليالىنىڭ باسشىلارى باستاعان ەل اعالارى قاتىستى. بۇگىندە اۋدانداعى 21 كىتاپحانادا 4200 كىتاپ قورى بار.
