"تويشىل قاۋىمعا اياۋشىلىق جوق". الماتىدا قۇدا كٷتۋ مەن تۋعان كٷن تويلاۋعا شەكتەۋ قويىلدى
مەگاپوليستەگٸ سانيتارلىق-ەپيدەميولوگييالىق احۋال مۋتاتسييالانعان كۆي-دٸڭ دەلتا شتاممىنا بايلانىستى ۋشىعا تٷسۋدە. الماتىدا ٶتكەن تەۋلٸكتە كوروناۆيرۋس ينفەكتسيياسىنىڭ 1219 جاڭا جاعدايى تٸركەلدٸ. نەگٸزٸنەن, كارانتيندٸك شەكتەۋلەرٸ ساقتالماعان نىسانداردا جۇقتىرۋ قاۋپٸ جالعاسۋدا.
كٶبٸنەسە كارانتين شەكتەۋلەرٸ جۇمىس رەجيمٸ مەن كەلۋشٸلەر اراسىنداعى ەلەۋمەتتٸك قاشىقتىقتى ساقتامايتىن ويىن-ساۋىق ورىندارىندا انىقتالادى. سونىمەن قاتار مەكەمە قىزمەتكەرلەرٸ بەتپەردە رەجيمٸن ساقتامايدى. سونداي-اق سىرقاتتانۋشىلىقتىڭ ٶسۋٸنە بايلانىستى الماتىلىقتار ٷيلەنۋ تويى مەن سالتاناتتى ٸس-شارالاردى ٶتكٸزۋدٸ جالعاستىرۋدا.
دەمالىس كٷندەرٸ بوستاندىق اۋدانىنىڭ مونيتورينگتٸك توبى دۋلاتي كٶشەسٸنٸڭ بويىندا ورنالاسقان 18 مەيرامحانا مەن بانكەت زالىن تەكسەردٸ. ەكٸ مەكەمەدە كارانتيننٸڭ بۇزىلۋى انىقتالدى. Bi Kumis سالتانات زالىندا 85 قوناقتىڭ قاتىسۋىمەن قۇدالىق ٶتتٸ, ال "ۇلىتاۋ" مەيرامحاناسىندا 45 ادامعا ەسەپتەلگەن تۋعان كٷن ٶتتٸ.
توي ۇيىمداستىرۋشىلارى قر ەكٸمشٸلٸك كودەكسٸنٸڭ 425-بابى 1-بٶلٸگٸ بويىنشا ەكٸمشٸلٸك جاۋاپكەرشٸلٸككە تارتىلدى. ال مەكەمە يەلەرٸنە قاتىستى بوستاندىق اۋدانىنىڭ سانيتارلىق-ەپيدەميولوگييالىق باقىلاۋ باسقارماسىنا ماتەريالدار جينالدى.
تەرتٸپ بۇزۋشىلار تٸزٸمٸندە مەدەۋ اۋدانىنداعى "اتموسفەرا" مەيرامحاناسى دا بار, وندا 24 شٸلدەگە قاراعان تٷنٸ 100-گە جۋىق ادام بولدى. ناۋرىزباي اۋدانىندا "گرانادا حولل" مەيرامحاناسىندا بۇزۋشىلىق تٸركەلدٸ, وندا سالتاناتتى ٸس-شاراعا 100-دەن استام ادام جينالدى. سول اۋداندا "سامير" مەيرامحاناسىندا 100-گە جۋىق قوناق بولدى.
المالى اۋدانىنداعى "كينو" كافەسٸندە كارانتين بۇزىلدى, وندا 60 ادام بولدى. 25 شٸلدەدە تٷن ورتاسىندا مەدەۋ اۋدانىنىڭ Late night show بارىندا 110-120 ادام بولعان بۇزۋشىلىق تٸركەلدٸ.
تەرتٸپ بۇزۋشىلاردىڭ تٸزٸمٸنە ناۋرىزباي اۋدانىنىڭ "باق ساراي" مەيرامحاناسى دا تٸركەلدٸ, وندا 100 قوناق بولدى. سونداي-اق 90 كەلۋشٸ بولعان "سۇلتان ساراي" مەن "نۇر-اي" مەيرامحانالارىندا بۇزۋشىلىقتار انىقتالدى.
ەۋەزوۆ اۋدانىنىڭ موبيلدٸ توپ ٶكٸلدەرٸ 24 شٸلدە كٷنٸ جەتٸسۋ-4 شاعىن اۋدانىنداعى "ۆەسەليدزە" دەمحاناسىنداعى بۇزۋشىلىقتاردى انىقتادى. جازعى تەرراسسادا كەلۋشٸلەردٸڭ سانى 50%-دان اسۋىنا بايلانىستى كارانتين شەكتەۋٸ بۇزىلدى. سونداي-اق قىزمەتكەرلەر كەلۋشٸلەرگە بەتپەردەسٸز قىزمەت كٶرسەتتٸ.
جالپى, وسى جىلى كارانتيندٸك شارالاردى بۇزعان 2767 نىسان انىقتالىپ, 4798 حاتتاما تولتىرىلدى. زاڭدى تۇلعالارعا 167 ملن. تەڭگەدەن استام سوماعا 479 حاتتاما جاسالدى. جەكە تۇلعالارعا قاتىستى بەتپەردە رەجيمٸن بۇزعانى ٷشٸن 190 ملن تەڭگەگە جۋىق سوماعا 4319 حاتتاما تولتىرىلدى.
كارانتيندٸ قاساقانا بۇزۋشىلارعا قاتىستى قاتاڭ شارالار قابىلدانۋدا. جينالعان ماتەريالداردى سانيتارلىق دەرٸگەرلەر قىزمەتٸن توقتاتۋ ٷشٸن سوتتارعا بەرەدٸ. بيىلعى جىلى بارلىعى 75 ماتەريال بەرٸلٸپ, 65-ٸ بويىنشا شەشٸم قابىلداندى.
الماتىدا كۆي-دٸڭ تارالۋىنىڭ الدىن الۋ جٶنٸندەگٸ قالالىق شتاب الماتىلىقتاردى كارانتيندٸك شەكتەۋلەردٸ ساقتاۋعا, رۇقسات ەتٸلگەن جۇمىس كەستەسٸنەن تىس ويىن-ساۋىق ورىندارىنا بارماۋعا شاقىرادى. بەتپەردە رەجيمٸن قاتاڭ ساقتاپ, قوعامدىق تاماقتانۋ ورىندارى مەن ٷيدە دە مەرەكەلەر ۇيىمداستىرماعان جٶن.
