توقايەۆتىڭ توڭىرەگى اقپاراتتىق شابۋىلدى كىم جۇرگىزىپ جاتقانىن ءبىلىپ وتىر - ساراپشىلار

كوركەم الدابەرگەنوۆا 24 ءساۋ. 2024 11:26 179869

كەيىنگى كەزدە كرەملدىڭ ءسوزىن سويلەيتىن الەۋمەتتىك مەديانىڭ بەلسەندىلىگى كۇرت ارتقان، - دەپ حابارلايدى Dalanews.kz.

"چەمودان گوسسەكرەتوۆ" تەلەگرام ارناسىنىڭ مالىمەتىنشە، ماسكەۋدىڭ استاۋىنان جەم جەپ وتىرعان استىرتىن ارنالار قازاقستانداعى پروبلەمالار تۋرالى بەلسەندى جازا باستاعان.

"ونىڭ ارتىندا وقيعانى وزىنە قاجەت قىرىنان كورسەتۋمەن عانا ەمەس، ەلدەگى بيلىكتى اشىقتان-اشىق قارالاۋمەن دە اينالىساتىندار تۇرعانى انىق. قازىرگى ۋاقىتتا ەلدەگى سۋ تاسقىنىنا بايلانىستى اقپاراتتار كەڭىنەن تاراپ جاتىر. ەرەكشە كوزگە تۇسەتىنى استاناداعى رەسەي ەلشىلىگى ورنالاسقان كوشەنىڭ اتىمەن اتالعان "بارايەۆا" تەلەگرام-ارناسى. بۇل ارنانىڭ جالپى تاقىرىبى جەو اپاتتارى نەمەسە ەلدى مەكەندەردەگى سۋ تاسقىنى، ەسكى قازاقستان وكىلدەرىنەن مۇراعا قالعان ينفراقۇرىلىمدىق داعدارىستارمەن كۇرەستە قازاقستاندىق بيلىكتىڭ السىزدىگىن كورسەتۋگە باعىتتالعان.

جازبالاردىڭ مازمۇنى بىردەي: اۆتورلار نەگاتيۆ جاڭالىقتاردى جاريالاپ، كريزيس ودان ءارى كۇشەيەتىنىن جانە بۇل الەۋمەتتىك شيەلەنىسكە اكەلەتىنىن ايتادى. تەلەگرام ارنا دەرەكتەرمەن اشىق تۇردە مانيپۋلياسيا جاساپ جانە جوق لوزۋنگتاردى ويلاپ تابۋ ارقىلى ودان ءارى نارازىلىق تۋدىرادى".

ساراپشىلاردىڭ سوزىنشە، رەسەيلىك دەپۋتاتتار مەن ساراپشىلار وسىلايشا قازاقستاننىڭ ىشكى ساياساتىنا پروۆوكاسيا ارقىلى اسەر ەتپەك.

"ءبىزدىڭ دەرەكتەر بويىنشا، پرەزيدەنت اپپاراتى قازاقستانعا قارسى وسى تىنىش اقپاراتتىق شابۋىلدى كىم جانە قانداي سەبەپتەرمەن جۇرگىزىپ جاتقانىن ءتۇسىنىپ وتىر. جەكەلەگەن ورىنداۋشىلاردىڭ شامادان تىس باستاماشىلىعى ەكى مەملەكەت اراسىنداعى ىنتىماقتاستىقتىڭ ساپاسىنا تەرىس اسەر ەتۋى مۇمكىن"، - دەلىنگەن جازبادا.

ەسكە سالايىق، بۇعان دەيىن الەۋمەتتىك جەلىدە ەسكى قازاقستاندى جاقتاۋشىلاردىڭ بەلسەندىلىگى ارتقانى تۋرالى جازعان ەدىك.

ال تاراپ جاتقان اقپاراتتاردىڭ سارىنى ءبىر. ولار نازاربايەۆ بيلىكتە وتىرعان كەزدە حالىقتىڭ جاعدايى جاقسى بولىپتى دەگەن پىكىردى جەلەۋ ەتىپ ءجۇر.  ماسەلەن، "ەلباسى نازاربايەۆ" دەپ اتالاتىن TikTok ارنانىڭ نازاربايەۆ تاراپىنا تۇسىرىلگەن ۆيدەولارى ميلليونداپ قارالىم جيناپ ۇلگەرگەن.

پاراقشاداعى ۆيدەولاردىڭ بىرىندە "حالىق نازاربايەۆقا شۇكىرشىلىك جاساي الماعانى" ايتىلادى.

سونىمەن قاتار، رەسەيلىك ارنادا قازاقستانعا قارسى پروۆوكاسيا جاسالدى. رەسەيلىك تەلەارنادا قازاقستان جايلى ەكى سەريالى فيلم شىقتى. فيلمدە قازاقستاندا "رۋسوفوبيا" بارى، ەل بيلىگى باتىستىڭ ماريونەتكاسى ەكەنى ايتىلادى. فيلم اۆتورى - رەسەيدىڭ مەملەكەتتىك دۋماسىنىڭ دەپۋتاتى اندرەي لۋگوۆوي. ول كرەمل تاپسىرماسى بويىنشا 2006 جىلى رەسەيلىك ساياسي ەميگرانت الەكساندر ليتۆينەنكونى ۋلاعانىمەن بەلگىلى.

فيلم مازمۇنى بويىنشا، رەسەيدىڭ ۋكرايناعا قارسى ايتىلعان تەزيستەرى قولدانىلعان: قازاقستاندا فاشيزم جانە "رۋسوفوبيا" بارى، ەل بيلىگى باتىستىڭ ماريونەتكاسى ەكەنى جانە رەسەيگە قارسى قاستاندىقتىڭ اينالاسىندا جۇرگەنى ايتىلادى.

22 مينۋتقا سوزىلعان فيلمدە قازاقستان باتىستىڭ شيكىزات كولونياسىنا اينالىپ بارا جاتىر دەگەن وي ايتىلادى. ءتىپتى قازاقستاندىق بلوگەر اناستاسيا احمەتوۆادان پىكىر العان. بلوگەر قازاقستان بيلىگى – باتىستىڭ اگەنتتەرى دەپ ايتادى. ونىڭ سوزىنشە، قازاقستاننىڭ ماقساتى – ەلدەگى بار بايلىقتى ساتىپ، ەلدى افريكاعا اينالدىرۋ.


ۇسىنىلعان
سوڭعى جاڭالىقتار