پرەزيدەنت قاسىم-جومارت توقايەۆتىڭ قاۋىپسىزدىك كەڭەسى وتىرىسىندا بەرگەن تاپسىرمالارىن ورىنداۋ شەڭبەرىندە پرەمەر-مينيستردىڭ وكىمىمەن ناشاقورلىق پروفيلاكتيكاسى جانە ەسىرتكى قىلمىسىنا قارسى ءىس-قيمىل بويىنشا مەملەكەتتىك ورگانداردىڭ قىزمەتىن ۇيلەستىرۋ جونىندەگى رەسپۋبليكالىق شتاب قۇرىلدى، دەپ حابارلايدى Dalanews.kz.
وعان پرەمەر-مينيستر باسشىلىق ەتەدى، باسشىنىڭ ورىنباسارلارى رەتىندە پرەمەر-مينيستردىڭ ورىنباسارى جانە ىشكى ىستەر ءمينيسترى ايقىندالدى.
شتابتىڭ نەگىزگى مىندەتى رەتىندە مەملەكەتتىك ورگانداردىڭ ناشاقورلىققا جانە ەسىرتكى بيزنەسىنە قارسى تۇرۋ جونىندەگى ءىس-قيمىلىن ۇيلەستىرۋ، الدىن الۋ شارالارىن جۇزەگە اسىرۋ بويىنشا ءتيىمدى تاسىلدەر ازىرلەۋ، ەسىرتكىگە تاۋەلدى ادامداردىڭ پروفيلاكتيكاسىن، ەمىن جانە وڭالتۋ جۇيەسىن جەتىلدىرۋ جۇمىستارى ايقىندالدى.
شتاب قۇرامىنا باس پروكۋراتۋرانىڭ، ۇلتتىق قاۋىپسىزدىك كوميتەتىنىڭ، قارجى مونيتورينگى اگەنتتىگىنىڭ، ۇلتتىق بانكتىڭ، قارجى نارىعىن رەتتەۋ جانە دامىتۋ اگەنتتىگىنىڭ وكىلدەرى، سونداي-اق، ءبىرقاتار جاۋاپتى مينيسترلىك باسشىلارى ەندى.
پرەمەر-مينيستردىڭ وكىمىمەن وبلىستاردا، استانا، الماتى جانە شىمكەنت قالالارىندا وڭىرلىك شتابتار قۇرۋ كوزدەلگەن.
