“سامۇرىق-قازىنا” ۇلتتىق ءال-اۋقات قورىنىڭ باس كەڭسەسىندە قىزمەتكەرلەر سانىن شامامەن 10 پايىزعا قىسقارتۋ جوسپارلانىپ وتىر. بۇل تۋرالى Atameken Business دەرەككوزى مالىمدەدى، دەپ حابارلايدى Dalanews.kz.
كەيىنگى ۋاقىتتا كۆازيمەملەكەتتىك سەكتورداعى كادر ساياساتى قوعام تاراپىنان ءجيى سىنعا ۇشىراپ كەلەدى. مەملەكەت باسشىسى قاسىم-جومارت توقايەۆ تا ناقتى جۇمىسقا تارتىلماعان قىزمەتكەرلەر ماسەلەسىن كوتەرىپ، كادرلىق قۇرىلىمدى قايتا قاراۋ قاجەت ەكەنىن اتاپ وتكەن ەدى.
پرەزيدەنتتىڭ سوزىنشە، كەيبىر ۇيىمداردا وندىرىستىك ۇدەرىستەرگە ناقتى قاتىسى جوق قىزمەتكەرلەر توبى قالىپتاسقان. ولار جۇمىس ۋاقىتىندا كافەلەر مەن قوناقۇيلەردە ۋاقىت وتكىزىپ، ينتەرنەتتى پايدالانىپ، ناقتى مىندەتتەر اتقارمايتىنى سىنعا الىنعان.
وسى سىن-پىكىرلەر اياسىندا ۇلتتىق حولدينگ باس كەڭسەدەگى شتات سانىن وڭتايلاندىرۋعا ءماجبۇر بولىپ وتىر. قىسقارتۋ كادرلىق قۇرىلىمدى ءتيىمدى ەتۋگە جانە جۇمىس ونىمدىلىگىن ارتتىرۋعا باعىتتالعان.
