قازاقستان پرەزيدەنتٸ قاسىم-جومارت توقاەۆتىڭ قىرعىزستانعا مەملەكەتتٸك ساپارى كەزٸندە قوعامدىق تەرتٸپتٸ ساقتاۋ ٷشٸن شامامەن 3,5 مىڭ ميليتسييا قىزمەتكەرٸ جۇمىلدىرىلادى. بۇل تۋرالى قىرعىز رەسپۋبليكاسى ٸشكٸ ٸستەر مينيسترلٸگٸنٸڭ باسپاسٶز قىزمەتٸ مەلٸمدەدٸ, دەپ حابارلايدى Dalanews.kz.
"مەملەكەتتٸك دەڭگەيدەگٸ ٸس-شاراعا بايلانىستى قوعامدىق تەرتٸپ پەن جول قوزعالىسىنىڭ قاۋٸپسٸزدٸگٸن قامتاماسىز ەتۋ ماقساتىندا شامامەن 3500 ميليتسييا قىزمەتكەرٸ تارتىلادى. رەسمي ٸس-شارالار ٶتەتٸن كٷندەرٸ ٸشكٸ ٸستەر ورگاندارىنىڭ قىزمەتكەرلەرٸ كٷشەيتٸلگەن تەرتٸپتە جۇمىس ٸستەيدٸ. كٶلٸك قوزعالىسى دەلەگاتسييا كورتەجٸ جٷرگەن سەتتە عانا ۋاقىتشا شەكتەلەدٸ: بٸشكەكتە "ماناس" ەۋەجايىنان مەملەكەتتٸك رەزيدەنتسيياعا دەيٸنگٸ باعىتتا, ەرٸ قاراي دوورونبەك سادىرباەۆ كٶشەسٸ ارقىلى "اتا-بەيٸت" مەموريالدىق كەشەنٸنە دەيٸن, سونداي-اق توگولوك مولدو كٶشەسٸندە", – دەلٸنگەن بەيسەنبٸ كٷنگٸ حابارلامادا.
ەسكە سالايىق, قاسىم-جومارت توقاەۆتىڭ قىرعىزستانعا مەملەكەتتٸك ساپارى 21–22 تامىزدا ٶتەدٸ.
بٸشكەكتە مەملەكەتتەر باسشىلارى قازاق-قىرعىز ستراتەگييالىق سەرٸكتەستٸگٸ مەن وداقتاستىق قاتىناستارىن ودان ەرٸ نىعايتۋ ماقساتىندا كەلٸسسٶز جٷرگٸزەدٸ.
سونداي-اق پرەزيدەنتتەر قازاقستان مەن قىرعىزستاننىڭ جوعارى مەملەكەتارالىق كەڭەسٸنٸڭ وتىرىسىنا قاتىسادى.
