الماتىداعى №1 بالالار ءۇيىنىڭ تاربيەلەنۋشىلەرىن قونايەۆقا كوشىرۋ تۋرالى شەشىم قوعامدا ۇلكەن نارازىلىق تۋعىزدى. 21 شىلدە كۇنى جوسپارلى كوشىرۋ – بالالاردىڭ جىلاۋى، تالىپ قالۋى، پوليسيا مەن جەدەل جاردەمنىڭ كەلۋىمەن اياقتالدى. الەۋمەتتىك جەلىلەردە ۆيدەوۇندەۋلەر تاراپ، قوعام بەلسەندىلەرى مەن جۋرناليستەر بۇل ءىستىڭ استارىندا نە جاتقانىن قازبالاپ جاتقاندا، اراعا پرەزيدەنت ارالاستى، دەپ حابارلايدى Dalanews.kz.
مەملەكەت باسشىسى قاسىم-جومارت توقايەۆ جاعدايمەن تانىسىپ شىققان سوڭ الماتى قالاسىنىڭ اكىمى دارحان ساتىبالدىعا «باعاناشىل» بالالار ءۇيىن جوندەپ، نىساندى قالانىڭ بالانسىنا قابىلداۋدى تاپسىردى. بۇل تۋرالى پرەزيدەنتتىڭ كەڭەسشىسى ءارى باسپا ءسوز حاتشىسى رۋسلان جەلدىباي مالىمدەدى. سونىمەن قاتار پرەزيدەنت اكىمشىلىگى تاراپىنان قىزمەتتىك تەرگەۋ تاعايىندالعانى حابارلاندى.
«10 جىل بويى جوندەۋگە قارجى بولمەگەن»: اششى شىندىق
الماتى وبلىسى اكىمدىگى بالالار ءۇيىن كوشىرۋدىڭ سەبەبىن «عيماراتتىڭ اپاتتى جاعدايى» دەپ تۇسىندىرگەن. ولاردىڭ ايتۋىنشا، 2020 جىلى «بيس پروەكت» ج ش س عيماراتقا كۇردەلى جوندەۋ قاجەت دەگەن قورىتىندى بەرگەن. الايدا سول ۋاقىتتان بەرى جوندەۋ جۇمىستارىنا قاراجات بولىنبەگەن. 2024 جىلى «استانا قۇرىلىس سەرۆيس» كومپانياسى وتكىزگەن جاڭا تەكسەرۋ عيماراتتىڭ «پايدالانۋعا مۇلدە جارامسىز» ەكەنىن راستاعان-مىس. اتالعان قۇجاتتى ەشكىم كورمەگەن.
قوعام قايراتكەرى ارۋجان سايننىڭ ايتۋىنشا، جوندەۋگە قاتىستى جوبالىق-سمەتالىق قۇجاتتاما، ساراپتاما قورىتىندىسى بار، زاڭدى راسىمدەلگەن.
«ءبىراق اكىمدىك بۇل جۇمىستىڭ بىردە-بىرىن ىسكە اسىرماعان. ەندى سەيسميكالىق ءقاۋىپ پەن «قورقىنىشتى اكتىلەرگە» سۇيەنىپ، عيماراتتان باس تارتقىسى كەلەدى. قۇجاتتى ەشكىم كورگەن جوق. ول بار ما – بەلگىسىز»، – دەدى ساين.
سونداي-اق بۇل داۋدىڭ استارىندا باعاناشىل ىقشاماۋدانىنداعى بالالار ءۇيىنىڭ جەر تەلىمى تۇر دەگەن كۇدىك بار. بۇل تۋرالى دا قوعامدا ءجيى ايتىلىپ ءجۇر.
ارىز، بەينەۇندەۋ جانە ارتقا شەگىنۋ
ناۋرىز ايىندا بالالار ءۇيىنىڭ تاربيەلەنۋشىلەرى الەۋمەتتىك جەلىگە ۆيدەوۇندەۋ جولداپ، قونايەۆقا كوشكىلەرى كەلمەيتىنىن ايتقان. «ءبىز ءوز ۇيىمىزدە قالعىمىز كەلەدى»، – دەدى ولار. بۇل ۇندەۋگە قوعام بەلسەندىلەرى قولداۋ ءبىلدىرىپ، 21 شىلدەدە بالالار ءۇيىنىڭ الدىنا جينالدى. ولار كوشىرۋ ارەكەتىنە جول بەرمەۋدى تالاپ ەتتى.
قىسىم كۇشەيگەن سوڭ الماتى وبلىسىنىڭ اكىمى مارات سۇلتانعازييەۆ ءوزى بالالار ۇيىنە بارىپ، تاربيەلەنۋشىلەرمەن، پەداگوگتارمەن، ديرەكتور روزا بەكىشيەۆامەن كەزدەسىپ، جاعدايدى كوزبەن كوردى. كەزدەسۋگە بالا قۇقىقتارى جونىندەگى ۋاكىل دينارا زاكييەۆا، ءبىلىم باسقارماسىنىڭ باسشىسى سالتانات بەسپايەۆا جانە وزگە دە لاۋازىمدى تۇلعالار قاتىستى.
ناتيجەسىندە، اكىمدىك رەسمي تۇردە: «ءقازىر وقىپ جۇرگەن بالالار الماتىدا قالادى، جاڭادان قابىلداناتىن بالالار قونايەۆتاعى جاڭا عيماراتقا ورنالاستىرىلادى» دەپ حابارلادى. وبلىس اكىمىنىڭ ايتۋىنشا، بالالاردىڭ وزدەرى قالعىسى كەلەتىنىن جانە جاڭا ورتاعا بەيىمدەلۋ ولار ءۇشىن قيىن بولاتىنىن ەسكەرىپ، شەشىم سولاي قابىلدانعان.
ال دەپۋتات نەگە الاڭداۋلى؟
الايدا جاعدايمەن تىنىشتالا بەرگەندە ءماجىلىس دەپۋتاتى باقىتجان بازاربەك شەنەۋنىكتەردىڭ ۋادەسىنە سەنبەۋگە نەگىز بار ەكەنىن كورسەتتى. ول 10 شىلدەدە شىققان الماتى وبلىسى ءبىلىم باسقارماسىنىڭ №270 بۇيرىعىن جاريالادى. قۇجاتتا "ارنايى الەۋمەتتىك قىزمەتتەردى قاجەت ەتەتىن بالالاردى قولداۋ ورتالىعىنىڭ" ورنالاسقان جەرى وزگەرەتىنى جازىلعان.
«بۇل نە سوندا؟ ءۇش اي بۇرىن سىزدەر بالالار ءۇيىن كوشىرمەيمىز دەپ سەندىردىڭىزدەر. ال مىنا بۇيرىق نەنى بىلدىرەدى؟ مەن رەسمي تۇسىنىكتەمە كۇتەمىن»، – دەپ جازدى دەپۋتات.
