كانتسلەر انگەلا مەركەلمەن كەلٸسسٶزدەن كەيٸن پرەزيدەنتكە باۋىرلاس ەلدٸڭ قازٸرگٸ جاعدايى جٶنٸندە سۇراق قويىلدى. قازاقستان باسشىسى ۋكراينامەن دوستىق ەرٸ ەرٸپتەستٸك بايلانىس بارىن العا تارتىپ, كەلەشەگٸنە بەي-جاي قارامايتىنىن بٸلدٸردٸ. سونداي-اق, تۇڭعىش پرەزيدەنت نۇرسۇلتان نازارباەۆتىڭ ۋكراينا مەسەلەسٸن شەشۋ جٶنٸندەگٸ ۇسىنىسىن ەسكە سالدى.
قاسىم-جومارت توقاەۆ, قازاقستان رەسپۋبليكاسىنىڭ پرەزيدەنتٸ:
– تۇڭعىش پرەزيدەنتٸمٸز قازاقستان اۋماعىندا ۋكراينا مەسەلەسٸن شەشۋگە باعىتتالعان بٸتٸمگەرلٸك ۇسىنىس جاسادى. دەگەنمەن, اراداعى كەلٸسپەۋشٸلٸكتەرگە, ەڭ الدىمەن, نورماند فورماتىنداعى جيىندا نٷكتە قويىلادى دەگەن ويدامىز. بۇل باسقوسۋ 9 جەلتوقساندا پاريجدە ٶتكەلٸ تۇر. تاراپتارعا سەتتٸلٸك تٸلەيمٸز. ۋكراينامەن بٸزدٸ دوستىق ەرٸ جان-جاقتى ەرٸپتەستٸك بايلانىستىرادى. ۋكراينا حالقىنا قۇرمەتپەن قارايمىز. ولار بەيبٸت تە بەرەكەلٸ ٶمٸر سٷرۋگە لايىقتى.
