"قازاقستاندا ءتۇرلى سالىق رەجيمى، كوپتەگەن جەڭىلدىكتەر مەن پرەفەرەنسيالار بار. ونىڭ ءبارى ەلىمىزدە سالىق وفشورى سياقتى احۋال قالىپتاستىردى. كاسىپكەرلەردىڭ ەكى نەگىزگى توبى پايدا بولدى. ولار – زاڭناماداعى ولقىلىقتاردى پايدالانىپ، سالىق سالىناتىن تابىسىن ءوزى ءۇشىن ازايتىپ كورسەتەتىندەر جانە بارلىق سالىقتى ادال تولەيتىندەر. كاسىپكەرلەردىڭ وسى ەكىنشى توبى باسەكەگە توتەپ بەرە الماي جاتىر". ۇلتتىق قۇرىلتايدا وسىلاي دەگەن مەملەكەت باسشىسى قاسىم-جومارت توقايەۆ سالىققا قاتىستى جاڭاشىلدىقتىڭ بارلىعى ادىلدىك ورناتۋ ءۇشىن جاسالىپ جاتقانىن ايتتى، دەپ حابارلايدى Dalanews.kz.
"ۇكىمەت سالىق تولەۋدەن جالتارۋ ءۇشىن بيزنەسىن بولشەكتەيتىندەردىڭ ارەكەتىنە ورىندى نازار اۋداردى. وكىنىشكە قاراي، مۇنداي جاعداي جاپپاي بەلەڭ العان. زاڭناماداعى ولقىلىقتار بيزنەستى بولشەكتەۋگە جول بەرىپ وتىرعانىن مويىنداۋ كەرەك. بۇل ماسەلەگە ۇكىمەت تە، دەپۋتاتتار دا جەتە ءمان بەرمەگەن"، - دەدى مەملەكەت باسشىسى بۇل رەتتە.
سونداي-اق پرەزيدەنت تاعى دا ادەمى كورسەتكىشتەرگە اۋەستەنىپ كەتۋدى سىنعا الدى.
"ەلىمىزدە 2 ميلليوننان استام سالىق تولەۋشى، ياعني جەكە كاسىپكەرلەر مەن زاڭدى تۇلعالار تىركەلگەن دەسەدى. ءبىراق ولاردىڭ قانداي كاسىپورىندار ەكەنىنە، قالاي پايدا بولعانىنا، قانشا سالىق تولەيتىنىنە، ءتىپتى ونى تولەپ جاتىر ما، جوق پا دەگەنگە ەش تالداۋ جاسالماعان. ءبىراق، قۇر كىنالاۋدان ءىس وڭعا باسپايدى. ەندى احۋالدى شۇعىل تۇزەتۋ قاجەت. ۇكىمەت پەن پارلامەنتكە ايتارىم – زاڭناماعا جەدەل تۇردە ءتيىستى تۇزەتۋلەردى ەنگىزۋ كەرەك"، - دەدى قاسىم-جومارت توقايەۆ.
پرەزيدەن ءادىل ءارى ءتيىمدى سالىق جۇيەسىن قۇرۋ ەلىمىزدىڭ بولاشاعىنا، كەيىنگى ۇرپاقتىڭ تۇرمىسىنا تىكەلەي اسەر ەتەتىنىن ۇعىنعان ءجون ەكەنىن ايتادى.
"بيلىك بيزنەسكە قولداۋ كورسەتىپ كەلدى، كورسەتە دە بەرەدى. بۇعان كۇمان بولماۋعا ءتيىس. ءبىراق بيزنەستىڭ ءوزى زاڭدى جانە زاڭسىز بولادى. ءبىز زاڭدى ساقتاۋ، تارتىپكە باعىنۋ كەرەك دەپ جاتامىز. ەندەشە ۇكىمەتتىڭ جانە جالپى بيلىكتىڭ قولداۋ شارالارىنىڭ يگىلىگىن، ءبىرىنشى كەزەكتە، ادال ءارى جاۋاپتى، ەڭ باستىسى، زاڭ اياسىندا جۇمىس ىستەيتىن كاسىپكەرلەر كورۋگە ءتيىس"، دەپ جالعاستىرادى ءوز ويىن بۇل رەتتە مەملەكەت باسشىسى.
بۇدان كەيىن مەملەكەت باسشىسى قولعا الىنىپ جاتقان سالىق رەفورماسىنا دا توقتالا كەتتى.
"ۇكىمەت سالىق رەفورماسىنا قاتىستى جاڭا تاسىلدەردى ۇسىندى. بۇل شارالار، جالپى العاندا، دۇرىس. وندا نەگىزگى ەكونوميكالىق جانە الەۋمەتتىك فاكتورلار ەسكەرىلگەن. كاسىبي ماماندار دا، جالپى جۇرتشىلىق تا قوسىمشا قۇن سالىعىنىڭ مولشەرلەمەسىن كوتەرۋ قاجەتتىگىنە تۇسىنىستىكپەن قارايدى. دەگەنمەن ۇسىنىلعان شارالارعا، سونىڭ ىشىندە، قوسىمشا قۇن سالىعىنا قاتىستى سىن-پىكىرلەر دە ەستىلىپ قالادى. ءبىراق مۇنداي پايىم شىنايى احۋالعا نەگىزدەلمەگەن"، - دەدى قاسىم-جومارت توقايەۆ.
بۇل رەتتە مەملەكەت باسشىسى قازاقستاننىڭ الەۋمەتتىك مەملەكەت ەكەنىن كوپتىڭ تاعى ءبىر ەسىنە سالدى.
"ءتۇرلى سەبەپكە بايلانىستى وزىنە اۋقىمدى الەۋمەتتىك مىندەتتەمە المايتىن ەلدەر از ەمەس. ال قازاقستاننىڭ بيۋدجەت قارجىسىنىڭ جارتىسىنان كوبى الەۋمەتتىك سالانىڭ ەنشىسىندە. ءبىزدىڭ ەلىمىز – الەۋمەتتىك مەملەكەت. سوندىقتان ءبىلىم بەرۋ، دەنساۋلىق ساقتاۋ سالالارىنا ينۆەستيسيا سالۋدى جالعاستىرامىز. بۇل – ءبىزدىڭ كونستيتۋسيالىق مىندەتىمىز. ءبىراق شىن مۇقتاج ازاماتتارعا عانا كومەك كورسەتىلۋى كەرەك. قىزمەتىن اسىرا پايدالانۋعا، الاياقتىققا جول بەرىلمەيدى. سوندىقتان باسىمدىق بەرىلمەگەن جوبالارعا بولىنەتىن قارجى ازايادى. بۇل قاجەت شارا ەكەنى ايدان انىق. ۇكىمەت وسى جىلدىڭ سوڭىنا دەيىن ونى قالاي وڭتايلاندىرۋ كەرەكتىگىن ءبىرجولا انىقتاپ الۋعا ءتيىس"، - دەيدى مەملەكەت باسشىسى.
وسىلاي دەگەن پرەزيدەنت سالىق رەفورماسىنا قاتىستى باتىل شارالاردى ءدال ءقازىر قابىلداۋ كەرەكتىگىن، ايتپەسە، بۇدان دا زور قيىندىققا تاپ بولاتىنىمىزدى ەسكەرتتى.
