"پرەزيدەنت قاسىم-جومارت توقايەۆ قازاقستان رەسپۋبليكاسى مەملەكەتتىك قىزمەتشىلەرى ادەپ كودەكسىنىڭ 9-تارماعىنىڭ تالاپتارىن ساقتاماعانى ءۇشىن قازاقستاننىڭ مىسىر اراب رەسپۋبليكاسىنداعى توتەنشە جانە وكىلەتتى ەلشىسى قايرات قايىربەك ۇلى لاما شاريفكە سوگىس جاريالادى"، - دەلىنگەن پرەزيدەتتىڭ باسپا ءسوز قىزمەتى حابارلاماسىندا.
...
بۇعان دەيىن ەل اتاۋىنا قاتىستى پىكىرىن بىلدىرگەن قايرات لاما-شاريف "ستان" ۇعىمى "مەملەكەت" ماعىناسىن بەرمەيتىنىن العا تارتىپ، "قازاق مەملەكەتى" دەگەن اتاۋدى قابىلداۋدى ۇسىنعان ەدى.
ونىڭ ايتۋىنشا، بۇگىنگى كۇنى بۇۇ-نىڭ قۇرامىنداعى 193 مەملەكەتتىڭ جەتەۋىنىڭ اتاۋى "ستان" جۇرناعىمەن اياقتالادى. قىرعىزستان، تاجىكستان، وزبەكستان، قازاقستان جانە تاعى باسقالار.
وسى ورايدا قايرات لاما-شاريف "ستان" جۇرناعىنىڭ رەسمي تەرمينى "مەملەكەت" ماعىناسىن بەرمەيتىنىن ايتقان.
"سوندىقتان، مەنىڭ پىكىرىمشە، اتا زاڭىمىزعا وزگەرىستەر ەنگىزگەندە قازاق مەملەكەتى، كازاحسكوە گوسۋدارستۆو (ورىسشاسى)، STATE OF QAZAQ (اعىلشىن تىلىندە) دەپ تايعا تاڭبا باسقانداي جازۋىمىز كەرەك"، – دەگەن ەدى لاما-شاريف.
سونىمەن قاتار، ديپلومات بۇۇ-عا مۇشە 193 ەلدىڭ 125ء-ى مەملەكەتتىڭ تولىق رەسمي اتاۋىنا "رەسپۋبليكاسى" دەگەن ءسوزدى قوسىپ جازاتىنىنا دا توقتالعان.
"وسى تىزىمدە اتىنا زاتى ساي كەلمەيتىن، دەموكراتيالىق قۇندىلىقتارىن جوعالتقان، ءبىر سۋپەرپرەزيدەنتكە جىلدار بويى تابىنعان "رەسپۋبليكالار" جەتكىلىكتى. سوندىقتان مەملەكەتتىگىمىزدى كورسەتەتىن "State of Qazaq" اتاۋىن كوپشىلىكتىڭ تالقىسىنا سالامىن"، – دەگەن بولاتىن ديپلومات.
ودان بولەك ول لاتىن تىلىنەن ەنگەن "ia" ءسوز تۋدىرۋشى جۇرناقتى قوسىپ، قىسقا اتاۋمەن اتالاتىن ەلدەردى دە ەسكەرىپ، قازاق مەملەكەتىنىڭ قىسقا اتاۋىن "QAZAQIA" دەگەنىمىز ءجون بولار دەگەن دە ۇسىنىسىن جەتكىزگەن.
