رەسەي پرەزيدەنتى ءپۋتيننىڭ باسپا ءسوز حاتشىسى دميتريي پەسكوۆ بۇگىنگى بريفينگىندە كرەمل 9 مامىردا ماسكەۋدە وتەتىن پارادقا شەتەلدىك ليدەرلەر شاقىرىلمايتىنىن ايتتى.

بريفينگتە ريا نوۆوستي اگەنتتىگىنىڭ ءجۋرناليسىنىڭ «پۋتين بۇگىن [قازاقستان پرەزيدەنتى] توقايەۆپەن سويلەسكەندە ونى 9 مامىردا ماسكەۋدەگى پارادقا شاقىردى ما؟» دەپ سۇراعاندا پەسكوۆ:

«جەڭىس كۇنىنە ءبىز شەتەلدىك ليدەرلەردى شاقىرمايمىز. بۇل – دوڭگەلەك داتا ەمەس. بۇل – ءبىزدىڭ مەرەكە، بۇل – بۇكىل رەسەي مەن رەسەيلىكتەر ءۇشىن قاسيەتتى مەرەكە. ءبىراق شەتەلدىك ليدەرلەردى شاقىرمايمىز. مەنىڭ بىلۋىمشە، لۋكاشەنكونى دا شاقىرۋ جوسپارلانباعان» دەدى.

كرەمل 9 مامىردا ماسكەۋدە جەڭىس كۇنىنە وراي اسكەري پارادقا دايىندالىپ جاتىر. بۇل اسكەري شەرۋ ۋكرايناداعى سوعىس تۇسىندا وتپەك. باتىس بارلاۋشىلارى ناۋرىزدا «كرەمل 9 مامىرعا دەيىن ۋكرايناداعى سوعىستا قانداي دا ءبىر جەتىستىككە جەتۋدى جوسپارلايدى» دەگەن ەدى. ءبىراق رەسەي اسكەريلەرى كييەۆ ماڭىندا ايتارلىقتاي جەتىستىككە جەتە الماي دونباسسقا قاراي اۋىسقان. ۇلىبريتانيا قورعانىس مينيسترلىگى «رەسەي اسكەريلەرى دونباسستا دا ايتارلىقتاي جەتىستىككە جەتە الماي جاتىر» دەيدى.

دەرەككوز: ازاتتىق