"مەنەن ەل ىشىندە جانە شەتەلدەن مەملەكەت باسشىسى رەفەرەندۋم ارقىلى پرەزيدەنتتىك مەرزىمىن سوزا ما، پرەزيدەنتتىك مەرزىمىن جويا ما دەپ قويادى. جاۋاپ بەرەيىن: ونداي ويىم بولماعان جانە بولمايدى دا" دەدى ول.
قازاقستان باسشىسى بۇل ءسوزىن 5 ماۋسىمدا وتەتىن كونستيتۋسياعا وزگەرىستەر ەنگىزۋ بويىنشا رەفەرەندۋم قارساڭىندا ايتتى. توقايەۆ قازاقستاندا كونستيتۋسيانى وزگەرتۋ بويىنشا رەفەرەندۋم العاش رەت وتەتىنىن اتاپ ءوتتى.
ەلدە بۇعان دەيىن رەفەرەندۋمدار ەلدىڭ ەكس-پرەزيدەنتى نۇرسۇلتان نازاربايەۆتىڭ بيلىگىن سوزۋ ءۇشىن عانا وتكىزىلگەن ەدى.
قازىرگى كونستيتۋسياعا ساي، ەلدە ءبىر ادام بەس جىلدان تەك ەكى رەت پرەزيدەنتتىككە سايلانادى. توقايەۆ 2019 جىلى 9 ماۋسىمدا وتكەن ۋاقىتىنان بۇرىن پرەزيدەنت سايلاۋىندا 70 پايىزدان ارتىق داۋىس جيناپ، پرەزيدەنت بولىپ سايلانعان. ونىڭ العاشقى پرەزيدەنتتىك مەرزىمى 2024 جىلى اياقتالادى.
ەلدى وتىز جىلداي باسقارعان نازاربايەۆ تا بيلىگىنىڭ العاشقى جىلدارى "مەرزىمىنەن ارتىق وتىرمايتىنىن"، "تۋىستارى بيلىككە ارالاسپايتىنىن" ايتقان ەدى. ءبىراق ول رەفەرەندۋم جانە مەرزىمىنەن بۇرىن سايلاۋ وتكىزۋ ارقىلى بيلىگىن بىرنەشە رەت سوزىپ العان. نازاربايەۆ بيلىگى تۇسىندا ونىڭ وتباسى مەن جاقىندارى ەلدەگى ەڭ باي ادامداردىڭ بىرىنە اينالدى.
5 ماۋسىمدا قازاقستان كونستيتۋسياسىنا ەنگىزىلەتىن وزگەرىستەر بۇكىلحالىقتىق رەفەرەندۋمعا شىعارىلادى. كوپتەگەن ساراپشىلار "رەفەرەندۋم ماسەلەسى قوعامدا جەتكىلىكتى تالقىلانبادى، بيلىك وزىنە ىڭعايلى نۇسقانى جاسادى" دەپ سىنايدى، قازاقستان بيلىگى "كونستيتۋسياعا رەفەرەندۋم ارقىلى ەنەتىن وزگەرىستەر ساياسي رەفورمانىڭ باستاۋى" دەپ ەسەپتەيدى.
جاڭا وزگەرىستەردە كونستيتۋسيادان قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ مارتەبەسى الىنادى.
