پرەزيدەنت پاۆلودار حالقىمەن كەزدەسۋدە وڭىرلەردە ارالاۋعا بەكىنگەندە ستراتەگيالىق ماڭىزدى مىندەتتەردى ايقىنداپ العانىن العا تارتتى.
– پاۆلودار – قازاقستاننىڭ دامۋىندا ۇلەسى مول، ماڭىزى جوعارى ايماق. وزدەرىڭىز بىلەسىزدەر، وتكەن اپتادان بەرى وڭىرلەرگە ساپارىم باستالدى. ايماقتارداعى حالىقپەن كەزدەسىپ، ەل دامۋىنا قاتىستى باستامالارىم تۋرالى ايتتىم. الدىمەن تۇركىستان مەن شىمكەنتكە، سودان كەيىن سەمەيگە باردىم.
ءبىز الداعى قىسقا دايىندىق بارىسىمەن تانىسىپ، شۇعىل ماسەلەلەردى قارادىق. وبلىستار ءۇشىن ستراتەگيالىق ماڭىزى بار مىندەتتەردى ايقىندادىق. ءبىر سوزبەن ايتقاندا، بۇل وتە ماعىنالى ساپارلار بولىپ جاتىر، – دەپ ويىن مەملەكەت باسشىسى ويىن ورتاعا سالدى. بۇدان كەيىن قاسىم-جومارت كەمەل ۇلى قولعا الىنعان ساياسي رەفورمالار جايىنداعى ويمەن ءبولىستى.
– شىن مانىندە، حالىقتىڭ قولداۋى – رەفورمالاردى تابىستى جۇزەگە اسىرۋدىڭ ەڭ باستى كەپىلى. مەن تىڭ وزگەرىستەرگە تىلەكتەس بولىپ جاتقان ازاماتتاردىڭ بارىنە تاعى دا العىس ايتقىم كەلەدى. ءبىز ءبىر ەل بولىپ جۇمىلا بىلسەك، كوزدەگەن ماقساتقا جەتەمىز.
بۇگىن، مىنە، وزدەرىڭىزبەن جۇزدەسۋ ءۇشىن ەرتىس بويىنا ات باسىن بۇردىم. بۇل وڭىرگە مەنىڭ ىقىلاسىم ەرەكشە ەكەنىن بىلەسىزدەر. پاۆلودار وبلىسى – ەلىمىزدىڭ ەڭ كورىكتى مەكەندەرىنىڭ ءبىرى، – دەدى. حالىقپەن جۇزدەسۋدە مەملەكەت باسشىسى ەل ومىرىندەگى پاۆلودار وبلىسىنىڭ ورىنى جايىنداعى ويىن بىلايشا ساباقتادى.
– ابىلايدىڭ اقىلشىسى بۇحار جىراۋ، عۇلاما ويشىل ءماشھۇر ءجۇسىپ، الاش ارداقتىسى جۇسىپبەك ايماۋىتوۆ وسىندا دۇنيەگە كەلگەن. جاياۋ مۇسا، ەستاي اقىن، سۇلتانماحمۇت تورايعىروۆ، شاكەن ايمانوۆ سىندى رۋحانيات سالاسىنىڭ ايتۋلى وكىلدەرى وسى وڭىردەن شىققان. قانىش ساتبايەۆ، الكەي مارعۇلان، ەرمۇحان بەكماحانوۆ، كەمەل اقىشيەۆ، شاپىق شوكين سياقتى ايگىلى عالىمدار – ەرتىس بويىنىڭ پەرزەنتتەرى. ءبىر سوزبەن ايتساق، باياناۋىل باۋرايى – تەكتىلەردىڭ بەرەكەلى بەسىگى.
پاۆلودار وبلىسىندا «قۋاتتى وڭىرلەر – قۋاتتى ەل» قاعيداتى ايقىن كورىنىس تاپقان. بۇل ايماقتى ەكونوميكامىزدىڭ ەنەرگەتيكالىق جۇرەگى دەۋگە بولادى. ەلىمىزدەگى ەلەكتر قۋاتىنىڭ 40 پايىزدان استامى وسىندا وندىرىلەدى. قازاقستاندا شىعارىلاتىن كومىردىڭ دە جارتىسىنان استامى پاۆلوداردىڭ ەنشىسىندە. وبلىستىڭ ءاربىر بەسىنشى تۇرعىنى وڭدەۋ ونەركاسىبىندە نەمەسە وتىن-ەنەرگەتيكا كەشەنىندە جۇمىس ىستەيدى.
ەلىمىزدەگى مۇناي-حيميا ونىمدەرىنىڭ ۇشتەن ءبىرى، فەرروقورىتپالاردىڭ جارتىسىنان كوبى وسى وڭىردە شىعادى. سونداي-اق، بۇل ولكە وڭدەۋ ونەركاسىبىنىڭ جانە شيكىزاتتىق ەمەس ەكسپورتتىڭ كولەمى بويىنشا الدىڭعى ورىندا تۇر، – دەپ كوكەيدە جۇرگەن ويىن ورتاعا سالدى.
پرەزيدەنت پاۆلودارعا جاساعان ساپارىندا وبلىستىڭ ترانزيتتىك مۇمكىندىگىن شەكتەپ وتىرعان ماسەلەگە دە باسا نازار اۋداردى. بۇل ەسكى كوپىردىڭ جىلى. ەرتىس وزىنىندەگى ەسكى كوپىر كولىك-لوگيستيكاسىن شەكتەپ وتىرعانى بەلگىلى. پرەزيدەنت اپاتتى جاعدايدا تۇرعان كوپىردىڭ رەتتەۋدى ۇكىمەتكە تاپسىردى.
– پاۆلوداردىڭ وراسان زور ترانزيتتىك الەۋەتى بار. ءبىراق، ەرتىستەن وتەتىن ەسكى كوپىر كولىك-لوگيستيكا سالاسىن دامىتۋعا مۇمكىندىك بەرمەي وتىر. ونىڭ اپاتتى جاعدايدا تۇرعانىنا ءبىراز جىل بولدى. كوپىر ارقىلى جۇك كولىكتەرىنىڭ جۇرۋىنە تىيىم سالىنعان. بۇعان دەيىن وبلىس ورتالىعىن اينالىپ وتۋگە جول اشاتىن جاڭا كوپىر سالۋ جوسپارلانعان. ۇكىمەتكە كەلەسى جىلى وسى جوبانى باستاۋدى تاپسىرامىن. جولدى كۇتىپ ۇستاۋعا باسا نازار اۋدارۋ قاجەت، – دەدى مەملەكەت باسشىسى.
سونىمەن قاتار پرەزيدەنت ەرتىس وزەنىنىڭ سۋىن تۇرعىنداردىڭ ءتيىمدى پايدالانۋ ماسەلەسىنە دە نازار اۋداردى.
– پاۆلودار ءوڭىرى ءۇشىن ەرتىستىڭ وراسان زور ماڭىزى بار. بۇل وزەن – وسى ولكەنىڭ تۇرعىندارى، كاسىپورىندارى جانە اۋىل شارۋاشىلىعى ءۇشىن نەگىزگى تىرشىلىك كوزى. سوڭعى ءۇش جىلدا وبلىستا سۋارمالى جەردىڭ كولەمى 1،5 ەسە ارتتى. الداعى ۋاقىتتا ونى تاعى 2 ەسەگە، ياعني، 300 مىڭ گەكتارعا دەيىن ۇلعايتۋ قاجەت. وبلىس اكىمدىگى وسى ماسەلەگە باسا نازار اۋدارۋعا ءتيىس. ۇكىمەتكە ءوڭىردىڭ سۋارمالى القاپتارىنا بولىنەتىن قارجىنى كوبەيتۋدى تاپسىرامىن. بۇل ازىق-تۇلىك قاۋىپسىزدىگى تۇرعىسىنان عانا ەمەس، حالىقتى جۇمىسپەن قامتۋ ءۇشىن دە وتە ماڭىزدى. سۋدىڭ تاپشىلىعى ەكونوميكانى دامىتۋعا كەدەرگى كەلتىرەدى. سوندىقتان، ەرتىستىڭ سۋىن ءتيىمدى، ۇنەمدى پايدالانۋعا ايرىقشا ءمان بەرىلۋى كەرەك، – دەپ كوپشىلىكتى سۋ كوزىن ءتيىمدى پايدالانۋعا شاقىردى.
